मुंबई | हिंगणघाट जळीतकांडातील पीडित तरुणीची आज (१० फेब्रुवारी) नागपूरच्या ऑरेंज हॉस्पिटलमध्ये उपचार करताना प्राणज्योत मालवली. पीडितेच्या मृत्यूने संपुर्ण महाराष्ट्रातून तीव्र प्रतिसाद उमटत आहेत शिवाय हिंगणघाटात संतप्त ग्रामस्थांनी रास्तारोको केला आहे. या पीडितेच्या मृत्यूनंतर अनेक राजकीय नेत्यांनी ट्विटरद्वारे खंत व्यक्त करत संतप्त प्रतिक्रियाही व्यक्त केल्या आहेत. खासदार सुप्रिया सुळे यांनी पीडितेला न्याय मिळवून देण्यासाठी सरकारने ठोस पावले उचलावी अशी विनंती ट्विटरद्वारे सरकारला केली.
अतिशय दुःखद..! अखेर हिंगणघाट प्रकरणातील युवतीचा मृत्यु झाला.या प्रकरणाची सुनावणी फास्टट्रॅक कोर्टात होतेय.पिडितेला न्याय मिळवून देण्यासाठी सरकारने ठोस पावले उचलावी ही विनंती.या मुलीला भावपूर्ण श्रद्धांजली.तिच्या कुटुंबीयांवर कोसळलेल्या दुःखात आम्ही सर्वजण सहभागी आहोत.
— Supriya Sule (@supriya_sule) February 10, 2020
यशोमती ठाकूर यांनी माझ्यातील आई आज सुन्न, नि:शब्द झाली आहे अशी शब्दांत हळहळ व्यक्त केली.
माझ्यातली आई आज सुन्न, नि:शब्द झालीय… महाराष्ट्राच्या लेकीचा जीवनाशी संघर्ष संपला, आपण या ‘हिंसक-पुरुषी’ मानसिकतेशी संघर्ष सुरू करूया #हिंगणघाट
— Adv. Yashomati Thakur (@AdvYashomatiINC) February 10, 2020
पंकजा मुंडे यांनी त्या अहंकारी क्रुर तरुणाला फाशी द्या अशी मागणी केली आहे.
हिंगणघाट येथील थरकाप उडवणाऱ्या घटनेतील तरुणीचा मृत्यु झाला .. सुन्न आणि अपराधी वाटत आहे ..इतक्या शतकांत आपण स्त्री ला प्रधानमंत्री, राष्ट्रपती,सरंक्षण मंत्री पाहू शकलो पण सामान्य स्व-कर्तृत्व करणाऱ्या स्त्री ला सुरक्षा नाही देऊ शकलो.. फाशी दिली पाहिजे त्या क्रूर अहंकारी तरुणाला .
— Pankaja Gopinath Munde (@Pankajamunde) February 10, 2020
ती आपल्यातून निघून गेली पण तिच्या मारेकऱ्याला कठोर शिक्षा द्यावी अशी मागणी राज्य शासनाकडे करणारे ट्विट माजी मुख्यमंत्री देवेंद्र फडणवीस यांनी केले आहे. शिवाय तिला श्रद्धांजलीही वाहिली आहे.
हिंगणघाटमधील दुर्दैवी घटनेतील पीडितेला अखेर आपल्या प्राणाला मुकावे लागले. तिच्या कुटुंबीयांना या दु:खातून सावरण्यासाठी शक्ती मिळावी, यासाठी मी प्रार्थना करतो.
— Devendra Fadnavis (@Dev_Fadnavis) February 10, 2020
हिंगणघाट जळीत प्रकरणाचा निकाल लवकरात लवकर लागावा आणि तुझ्या न्यायासाठी महाराष्ट्र सोबत आहे असे ट्विट जितेंद्र आव्हाड यांनी केले आहे.
हिंगणघाट प्रकरणातील ताईचा आज मृत्यू झाला.जीवनाच्या लढाईत जरी तू हरली असलीस तरी तुझ्या न्याय हक्कांच्या लढाईसाठी महाराष्ट्र तुझ्या सोबत आहे.या प्रकरणाचा लवकरात लवकर निकाल लागून जेंव्हा तिला न्याय मिळेल तेंव्हाच तिला ती योग्य श्रद्धांजली ठरेल.@AnilDeshmukhNCP@OfficeofUT
— Dr.Jitendra Awhad (@Awhadspeaks) February 10, 2020
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
