नगर |“सरकारने शनी शिंगणापूर देवस्थान हे तात्काळ ताब्यात घेऊन मुख्यमंत्र्यांनी भूमाता ब्रिगेडला अध्यक्षपद द्यावे आणि महिलेला अध्यक्ष करण्याची परंपरा चालू ठेवावी अन्यथा राज्यात मोठे आंदोलन करू”, असा इशारा भूमाता ब्रिगेडच्या तृप्ती देसाई यांनी दिला आहे. यासंदर्भात आम्ही मुख्यमंत्री देवेंद्र फडणवीस यांची भेट घेणार असल्याचेही त्यांनी शनी शिंगणापूर येथे बोलताना सांगितले.
तृप्ती देसाई यांनी आपल्या सहकाऱ्यांसमवेत 4 सप्टेंबरला (मंगळवारी) दुपारी २ च्या सुमारास शनी शिंगणापूरात शनी चौथऱ्यावरून दर्शन घेतले. “संपूर्ण राज्यातील मंदिरात दर्शनासाठी समानता असावी याकरिता आम्ही मोठे आंदोलन केले होते. आमच्या आंदोलनामुळे देशातील महिलांना शनी चौथऱ्यावर जाऊन दर्शन घेण्याचा हक्क मिळाला. तसेच राज्यातील अनेक मंदिरातील विविध प्रश्नांसाठी आमची संघटना लढत आहे. मंदिरात महिला पुजारी नेमावे यासाठीही आमचा लढा चालू आहे”, असे तृप्ती देसाई माध्यमांशी बोलताना म्हणाल्या.
नव्या विश्वस्त मंडळात सामाजिक कार्यकर्त्यांना स्थान द्या
शनी शिंगणापूर देवस्थान सरकारने ताब्यात घेऊन सुमारे २ महिने झाले तरीही अजून जुनेच विश्वस्त मंडळ काम पाहत आहे. सरकार नवीन विश्वस्त मंडळ का निवडत नाही, असा सवालही त्यांनी यावेळी उपस्थित केला. त्याचप्रमाणे नवीन विश्वस्त मंडळात सरकारने सामाजिक कार्यकर्त्यांना स्थान द्यावे. जर राजकीय लोकांना विश्वस्त मंडळात स्थान दिले गेले तर भूमाता ब्रिगेडकडून आंदोलन करण्यात येईल, असा इशारा तृप्ती देसाई यांनी यावेळी दिला आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
