पुणे | महापालिकेच्या गेल्या पंचवार्षिक निवडणुकीत महाराष्ट्र नवनिर्माण पक्षाचे तब्बल २९ नगरसेवक निवडून आले होते. मात्र त्यानंतर पक्षाची लोकप्रियता घसरण्यास सुरुवात झाली. सन २०१७ मध्ये झालेल्या महापालिका निवडणुकीत पक्षाचे अवघे दोन नगरसेवक निवडून आले. या दरम्यान, पक्षातील अंतर्गत वाद, मतभेद सातत्याने पुढे आले

येणारी लोकसभा आणि विधानसभा निवडणुकीच्या पार्श्वभूमीवर पक्षाची संघटनात्मक बांधणी करण्याच्या दृष्टीने मनसे अध्यक्ष राज ठाकरे यांनी पुण्यात लक्ष केंद्रित केले आहे. पक्ष बांधणी करण्यासाठी विविध स्तरावरील पदाधिकाऱ्यांच्या नियुक्त्या करणार असून मनसे अध्यक्ष राज ठाकरे ते त्यासाठी मंगळवार आणि बुधवारी (दि. ३० आणि ३१ जानेवारी) पुन्हा पुणे दौऱ्यावर जाणार आहेत.

ऑगस्ट महिन्यात पदाधिकाऱ्यांच्या नियुक्त्यांसाठी राज ठाकरे यांनी पुणे दौरा केला होता. त्या वेळी त्यांनी पदाधिकाऱ्यांशी संवाद साधत पक्षाची प्रतिमा वाढविणाऱ्या कार्यकर्त्यांना संधी देणार असल्याचे जाहीर केले होते. मनसे नेते शिरीष सावंत, संदीप देशपांडे तसेच उपाध्यक्ष प्रमोद पाटील हे या वेळी उपस्थित राहणार आहेत. या दौऱ्याच्या निमित्ताने राज ठाकरे हे पदाधिकाऱ्यांशी संवाद साधण्याची शक्यता आहे. त्यामुळे कार्यकर्ते आणि पदाधिकाऱ्यांचे लक्ष राज ठाकरे यांच्या दौऱ्याकडे लागले आहे.