पुणे | डॉ. नरेंद्र दाभोळकर यांच्या हत्या प्रकरणातील संशयित आरोपी सचिन अंदुरेच्या पोलीस कोठडीत दोन दिवसांची वाढ करण्यात आली आहे. सचिन अंदुरे आणि शरद कळसकर या दोघांची एकत्रित चौकशी करायची असल्याने सीबीआय कोठडी वाढवून देण्याची मागणी सीबीआयच्या वतीने करण्यात आली. अखेर न्यायालयाने ही मागणी मान्य करत सचिन अंदुरेची कोठडी १ सप्टेंबरपर्यंत वाढवली.
दुसरीकडे शरद कळसकरचा ताबा ३ सप्टेंबरपर्यंत महाराष्ट्र एटीएसकडे आहे. त्याचा ताबा सीबीआयकडे देण्यास मुंबई उच्च न्यायालयाने नकार दिल्याने, आता सीबीआय सचिन अंदुरेला घेऊन मुंबईला महाराष्ट्र एटीएएसच्या कोठडीत असलेल्या कळसकरकडे जाणार आहे. तिथे दोघांना एकमेकांसमोर बसवून चौकशी करण्यात येणार आहे.
गुरुवारी अंदुरेला सीबीआयने पुणे न्यायालयात हजर केले. सचिन अंदुरे आणि शरद कळसकर या दोघांची एकत्रित चौकशी करणे गरजेचे असल्याने कोठडी वाढवून देण्याची आवश्यकता आहे, असा युक्तिवाद सीबीआयच्या वतीने करण्यात आला. अखेर न्यायालयाने दोन्ही बाजू ऐकून घेतल्यानंतर सचिन अंदुरेच्या कोठडीत दोन दिवसांची वाढ केली आहे. सचिन अंदुरेला १ सप्टेंबरपर्यंत पोलीस कोठडीत ठेवले जाणार आहे.
ज्येष्ठ पत्रकार गौरी लंकेश हत्या प्रकरणातील तीन आरोपींचा ताबा मिळवण्यासाठी कोर्टात अर्ज करण्यात आला आहे. या हत्या प्रकरणातील आरोपी सचिन अंदुरेच्या संपर्कात होते. त्याचप्रमाणे सचिनच्या मेहुण्याकडे सापडलेल्या पिस्तुलातूनच लंकेश यांची हत्या केल्याचे समोर आले आहे, अशी माहितीही सीबीआयने न्यायालयात दिली. त्यामुळे सचिन अंदुरेची पोलीस कोठडी वाढवून द्यावी, असा युक्तिवाद सीबीआयच्या वतीने करण्यात आला आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
