भाजपच्या  घोटाळेबाज मंत्र्यांना शिवसेनेने केले लक्ष 

मुंबई – कर्जमुक्ती असो अथवा शेतकऱ्यांच्या आत्महत्या असो शिवसेनेनं भाजपला लक्ष केले आहे. महागाई विरोधातही शिवसेना रस्त्यावर उतरली होती. आता शिवसेनेनं आपला मोर्चा भाजपच्या ज्या मंत्र्यांवर घोटाळ्याचे आरोप झाले त्यांच्याकडे मोर्चा वळवला आहे. त्याची माहिती देणारी एक पुस्तिकाच शिवसेनेनं प्रकाशीत केली आहे. शिवसेनेच्या प्रमुख पदाधिकाऱ्यांची बैठक आज शिवसेना भवनमध्ये झाली.

त्यावेळी ही पुस्तिका शिवसेना पक्षप्रमुख उद्धव ठाकरे यांनी या पदाधिकाऱ्यांना दिली. त्यामुळे उद्धव यांनी भविष्यातील राजकारणाची दिशा काय असेल याचे संकेतच दिले आहेत. घोटाळेबाज भाजप असे या पुस्तिकेचे शिर्षक देण्यात आले आहे. त्याच्या मुखपृष्ठावर भ्रष्ठाचाराचे आरोप झालेल्या एकनाथ खडसे, विनोद तावडे, गिरीश बापट आणि भाजप खासदार दिलीप गांधी यांचे छायाचित्र छापण्यात आले आहे. शिवाय आता पर्यंत किती घोटाळे भाजपच्या काळात झाले त्याची यादीही यात देण्यात आली आहे. विशेष म्हणजे महाराष्ट्रातील भ्रष्ठाचारा बाबतच यात उल्लेख नाही तर केंद्रातील नेत्यांनी आणि भाजपची सरकार असलेल्या राज्यात झालेल्या घोटाळ्यांचाही उल्लेख यात आहे. उद्धव यांनी घेतलेल्या या भूमिकेमुळे शिवसेना आगामी लोकसभा आणि विधानसभा निवडणूक स्वबळावर लढण्याची तयारी आत्तापासूनच करत आहे हे स्पष्ट आहे.