मुंबई | अंधेरी पश्चिम परिसरात पालिकेची ‘डी. एन. नगर मनपा शाळा’ आहे. या शाळेच्या ३० हजार चौरस फुटांच्या खेळाच्या मैदानावर ८ हजार चौरस फुटांचे अनधिकृत बांधकाम उद्भवले होते. तसेच सदर प्रकरण न्यायप्रविष्ट होते. या अनुषंगाने उच्च न्यायालयाने नुकताच पालिकेच्या बाजूने निकाल दिल्यानंतर सदर अनधिकृत बांधकाम तोडण्यात आले आहे. परिमंडळ ४ चे उपायुक्त किरण आचरेकर यांच्या मार्गदर्शनानुसार करण्यता आलेल्या या कारवाईमुळे आता सदर पालिका शाळेतील विद्यार्थ्यांना खेळाचे अधिक मोठे मैदान उपलब्ध होणार आहे. तसेच या मैदानावर पुन्हा अतिक्रमण होऊ नये. यासाठी मैदानाच्या सीमेवर लवकरच संरक्षक भिंत बांधण्यात येणार आहे, अशी माहिती ‘के पश्चिम’ विभागाचे सहाय्यक आयुक्त प्रशांत गायकवाड यांनी दिली आहे.
पालिकेच्या ‘के पश्चिम’ विभागांतर्गत जुहू, जोगेश्वरी (प.), अंधेरी (प.), विलेपार्ले (प.), जुहू समुद्रकिनारा, ओशीवरा, वर्सोवा व वर्सोवा समुद्र किनारा इत्यादी परिसरांचा समावेश होतो. या ‘के पश्चिम’ विभागात डी. एन. नगर पोलीस स्टेशनच्या मागे पालिकेची ‘डी. एन. नगर’ मनपा शाळा आहे. या शाळेलगत शाळेचेच सुमारे ३० हजार चौरस फुटांचे खेळाचे मैदानही आहे. या मैदानाच्या सुमारे ८ हजार चौरस फुटांच्या भागावर अनधिकृत बांधकाम केले होते. याबाबत उच्च न्यायालयाने महापालिकेच्या बाजूने निकाल दिल्यानंतर गेल्या तीन दिवसांत करण्यात आलेल्या कारवाई दरम्यान सदर अनधिकृत बांधकाम तोडण्यात येऊन खेळाचे मैदान मोकळे करण्यात आले आहे. मुंबई पोलीस दलाच्या विशेष सहकार्याने करण्यात आलेल्या या कारवाई करिता ४२ पोलिसांचा ताफा घटनास्थळी तैनात होता. तसेच या कारवाईत पालिकेचे ३० कामगार, कर्मचारी, अधिकारी देखील सहभागी झाले होते. या कारवाईसाठी २ जेसीबी, २ ‘लॉरी’ यासह हातोडे, घण व इतर आवश्यक साधनसामुग्री वापरण्यात आली आहे, अशीही माहिती सहाय्यक आयुक्त प्रशांत गायकवाड यांनी दिली आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
