मुंबई | मुंबई महापालिकेत असलेल्या पत्रकार कक्षाला कुलूप असल्यामुळे आता नवीन वादाला तोंड फुटले आहे. आज महाराष्ट्र नवनिर्माण सेनेच्या होणाऱ्या पत्रकार परिषदेला परवानगी नाकारल्यामुळे हा वाद निर्माण झाला आहे. पत्रकार कक्षाला कुलूप लावल्याने संतप्त मनसे कार्यकर्त्यांनी जनसंपर्क कक्षात धडक मारुन जाब विचारला.
बीएमसीमधील या पत्रकार कक्षेत मनसेचे सरचिटणीस संदीप देशपांडे महापालिकेच्या एका आरक्षित भूखंडाबाबत पत्रकार परिषद घेणार होते. मात्र इथे पत्रकार परिषदेला परवानगी नसल्याचं कारण देत जनसंपर्क विभागाने या कक्षाला कुलूप लावलं. तसंच महापालिकेच्या प्रवेशद्वारावर बंदोबस्तही वाढवण्यात आला आहे. या प्रकारामुळे संतप्त झालेल्या संदीप देशपांडे यांनी महापालिकेचे जनसंपर्क अधिकारी विजय खबाळे यांच्या कक्षात धडक मारत जाब विचारला. दरम्यान, यासर्व प्रकारामागे शिवसेना असल्याचा आरोप संदीप देशपांडे यांनी केला आहे.
एवढी घाबरलेली शिवसेना पहिल्यांदा पाहीली
आजपर्यंत शिवसेनेला इतरांच्या पत्रकार परिषदा उधळताना बघितले होते, स्वत:च्या पत्रकार परिषदा गाजवताना बघितले होते, पण आज पहिल्यांदा शिवसेनेला कुणाच्यातरी पत्रकार परिषदेमुळे घाबरलेले बघितले . शिवसेना आम्हाला घाबरली कारण, त्यांच्या मनातच काळेबेरे आहे. स्थायी समिती अध्यक्ष यशवंत जाधव यांनीच जनसंपर्क विभागाला मनसेची पत्रकार परिषद रोखण्यास सांगितले आणि पत्रकार कक्षालाच टाळे लावले, अशा आरोप संदीप देशपांडे यांनी केला आहे. दादरमधील शिवाजी पार्कच्या जिमखान्याच्या जागेवर नवा महापौर बंगला बांधण्याचा विचार सुरु आहे. इथे दहा हजार महापालिका कर्मचारी व्यायामशाळेत येतात आणि इतर मैदानी आणि बैठे खेळ खेळतात. इथे महापौर बंगला झाला तर मनसेचा विरोध राहिल. बंगल्याची एकही विट इथे रचू देणार नाही. असा इशारा संदीप देशपांडे यांनी दिला. महापौर बंगल्याचा विषय आज पत्रकार परिषदेत होता, म्हणूनच शिवसेना घाबरली आणि माझी पत्रकार परिषद रोखली, असेही संदीप देशपांडे म्हणाले आहेत.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
