मुंबई | करी रोड आणि एल्फिन्स्टन पुलावरील वाहतुकीत पोलिसांनी बदल केला आहे. वाहनांनी सदैव गजबजलेल्या या परिसरातील वाहतूक आता १५ जूनपर्यंत वन वे केली आहे. अचानक पोलिसांनी हा प्रयोग हाती घेतल्यामुळे नागरिकांना प्रचंड त्रास आणि गैरसोयीला सामोरे जावे लागत आहे. सध्या वाहनचालकांना पाच मिनिटांच्या प्रवासाकरिता १५ ते २० मिनिटे प्रवास करत वळसा मारून इच्छितस्थळी जावे लागत आहे.

वाहतूक सुरळीत ठेवण्याबरोबर कायदा व सुव्यवस्था अबाधित राखण्यासाठी वाहतूक पोलिसांनी करी रोड आणि एल्फिन्स्टन पुलावरील वाहतुकीत १५ दिवसांसाठी बदल केला आहे. प्रभादेवी, एल्फिन्स्टनला जाण्यासाठी करी रोड पूल हा वन वे केला असून त्या ठिकाणाहून हिंदमाता, परळमध्ये येण्यासाठी एल्फिन्स्टन पूल वन वे केला आहे. १ जून पासून १५ दिवस २४ तासांसाठी हा प्रयोग हाती घेण्यात आला आहे, मात्र हे गैरसोयीचे असल्याचे म्हणत या वन वे विरोधात एल्फिन्स्टन येथील नागरिकांनी विरोध दर्शविल्याचे पहायला मिळत आहे.