मुंबई | गणेशोत्सवादरम्यान बरेचदा गणेशमंडळांकडून आकडे टाकून वीजचोरी करण्यात येते. या प्रकारामुळे वीजचोरी तर होतेच, शिवाय बरेचदा अनधिकृत पद्धतीने वीज घेतल्याने अपघात होण्याचाही धोका असतो. या पार्श्वभूमीवर महावितरणकडून गणेश मंडळांना सवलतीच्या दरात वीज उपलब्ध करून देण्यात येत आहे.

सार्वजनिक गणेशोत्सव मंडळांना वहन आकारासह ४ रुपये ३८ पैसे प्रति युनिट दराने तात्पुरती वीजजोडणी देण्याचा निर्णय महावितरणने घेतला आहे. गणेशोत्सव मंडळांनी या सवलतीचा लाभ घेऊन तात्पुरती अधिकृत वीजजोडणी घ्यावी. तसेच गणेशोत्सवात सुरक्षेच्या उपाययोजना कराव्यात, असे आवाहन महावितरणने केले आहे.

सर्व धर्मियांच्या सार्वजनिक उत्सवांकरिता तात्पुरत्या वीज जोडणीसाठी प्रति युनिट तीन रुपये २० पैसे अधिक एक रुपया १८ वर्षे वहन आकार असा ४ रुपये ३८ पैसे प्रति युनिट वीजदर आहे. घरगुती वीज दरापेक्षा १३ पैशांनी अधिक आहे. वाणिज्यिक दरापेक्षा २ रुपये ९०पैशांनी कमी आहे. धार्मिक उत्सवांसाठी संस्थांनी अधिकृत वीज जोडणी घेऊन सार्वजनिक सुरक्षेला महत्त्व द्यावे यासाठी वीज दर कमी ठेवण्यात आला आहे. सवलतीत वीज उपलब्धतेसाठी मंडळांनी १९१२, १८००१०२३४३५ या टोल फ्री क्रमांकावर संपर्क साधावा.