गोवा। “मी कधीही ख्रिश्चनविरोधी नव्हतो. मी ख्रिश्चन समाजाविरुद्ध काहीच बोललो नाही आणि हिंदू व ख्रिश्चनांचा डीएनए एकसमान आहे”, असे गोव्याच्या राष्ट्रीय स्वयंसेवक संघाचे माजी प्रमुख सुभाष वेलिंगकर यांनी म्हटले आहे. “हिंदू, मुस्लीम व ख्रिश्चन असा भेदभाव मी कधीही केलेला नसून सर्वच समान आहेत”, असे वक्तव्यही त्यांनी केले आहे. “मी ख्रिश्चन बांधवांशी संपर्क साधून त्यांच्या मनात काही गैरसमज असतील तर दूर करीन”, असे सुद्धा सुभाष वेलिंगकर यांनी सांगितले आहे. दरम्यान, राष्ट्रीय स्वयंसेवक संघ सोडल्यानंतर ख्रिश्चनांच्या संदर्भातली वेलिंगकरांची भूमिका मवाळ झाल्याचे दिसून येत आहे.
राष्ट्रीय स्वयंसेवक संघ गोव्याच्या प्रमुखपदावर असलेल्या वेलिंगकरांनी २०१६ मध्ये संघाला सोडचिठ्ठी दिली होती. मुख्यमंत्री मनोहर पर्रिकर यांनी घेतलेला चर्चशी संबंधित कॉन्वेंट शाळांना अनुदान सुरू ठेवण्याच्या निर्णयाला वेलिंगकर यांचा विरोध होता. या मतभेदातून त्यांनी राष्ट्रीय स्वयंसेवक संघ सोडला होता. तसेच अल्पसंख्याकांची हुजरेगिरी करण्याचे पर्रीकरांचे धोरण असल्याचा आरोप त्यांनी केला होता.
सुभाष वेलिंगकर यांनी ‘गोवा सुरक्षा मंच’ या पक्षात नुकताच प्रवेश केला असून राजकारणात सक्रीय होण्याचे संकेत दिले आहेत. मांद्रेम इथल्या लोकसभेच्या पोटनिवडणुकीत वेलिंगकर गोवा सुरक्षा मंचाच्या तिकिटावर उतरतील अशी शक्यता व्यक्त करण्यात येत आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
