देवाच्या नावाने भीक मागणे हे सर्वांनाच माहित आहे. परंतु देवाच्या नावाने मतं मागणं आणि त्याच्या नावाने राजकारण करणं हे काहीतरी भलतचं आहे… सध्या भारताच्या राजकारणात “रामाच्या नावाने चांगभलं” हा ट्रेंड सुरू झाला आहे आणि त्याला राष्ट्रीय, प्रादेशिक आणि हिंदू संघटनांकडून मोठ्या प्रमाणात राजकीय खतपाणी मिळत आहे…
भाजपाचे नेते राम मंदिरासाठी कटिबद्ध असल्याचे सांगत आहेत तर शिवसेना पक्षप्रमुख उद्धव ठाकरे हे राम मंदिर उभारण्यासाठी महाराष्ट्रासोबतच देशाचे राजकारण ढवळून काढत आहेत… उद्धव ठाकरे यांनी “हर हिंदू की यही पुकार, पहले मंदिर फिर सरकार”, असा नवा नारा देऊन २४ आणि २५ नोव्हेंबरला राम जन्मभूमी अयोध्येच्या दौऱ्यावर जाणार आहेत तर एकीकडे राम मंदिराबाबत संवाद साधण्यासाठी उद्धव ठाकरे यांनी पाठवलेले निमंत्रण संत-महंतांनी धुडकावून लावले आहेत… या नेत्यांना रामापेक्षा राजकारणात रस असल्याचा आरोपही आखाडा परिषदेचे अध्यक्ष महंत नरेंद्र गिरी महाराज यांनी केला… तर काँग्रेसचे नेते आणि माजी केंद्रीय मंत्री सीपी जोशी सुप्रीम कोर्टाच्या निर्णयानंतर काँग्रेस अयोध्येत राममंदिर बांधणार असल्याचे सांगत आहेत…
मुळातच देशात दुष्काळ, रोजगार, महिला सुरक्षा, देशातील अंतर्गत सुरक्षा, काश्मीर प्रश्न, शेतकर्‍यांची कर्जमाफी हे प्रश्न असताना भाजपा सरकार पुतळे उभारण्यात, शहरांची नावं बदलण्यात आणि आता राममंदिर बांधण्यात राजकारण करत आहे…महाराष्ट्रात सुद्धा दुष्काळ, आरक्षण, शेतकरी-आदिवासी मोर्चा हे विषय गाजत असताना शिवसेना सुद्धा या विषयांना तिलांजली देऊन राममंदिराच्या मुद्दयाला अधिक महत्त्व देताना दिसत आहे…देशातील जनता आता सुज्ञ आणि सुशिक्षित झालेली आहे त्यामुळे “देवाच्या नावाने मतं मागणं” राजकीय पक्षांना येणार्‍या निवडणूकीत महागात पडू शकेल यात शंका नाही…
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
