नवी दिल्ली | विधानसभा निवडणुकांसंदर्भात भाजपाच्या केंद्रीय निवडणूक समितीची बैठक झाली आहे . या बैठकीला पंतप्रधान नरेंद्र मोदी आणि पक्षाध्यक्ष अमित शाह यांच्यासह भाजपाचे वरिष्ठ नेते उपस्थित होते. दिल्लीतल्या भाजपाच्या कार्यालयात आगामी निवडणुकीच्या जागा वाटपाच्या संदर्भात चर्चा झाली आहे . त्यामुळे भाजपा आज छत्तीसगड, मध्य प्रदेश, तेलंगणातल्या विधानसभा निवडणुकीसाठीच्या उमेदवारांच्या नावांची घोषणा करणार हे सूत्रांच्या माध्यमातून कळत आहे. बैठकीत मध्य प्रदेश, छत्तीसगड, तेलंगणात होणा-या विधानसभा निवडणुकीतल्या उमेदवारांच्या नावांबाबत चर्चा झाली आहे.

भाजपने राजस्थानात किमान ८० ते १०० नव्या उमेदवारांना संधी देण्याची माहिती सूत्रांकडून मिळाली. जवळपास मध्य प्रदेशातील ४० विधानसभा आमदारांना घरी बसवले जाणार असल्याच्या चर्चा रंगल्या आहेत. त्यामध्ये काही मंत्र्यांचाही समावेश आहे. तसेच भाजपा जवळपास बारापेक्षा अधिक खासदारांना या विधानसभा निवडणुकीत उतरवण्याची शक्यता आहे.

छत्तीसगडमध्ये १२ आणि २० नोव्हेंबरला दोन टप्प्यात निवडणुका होणार आहेत. मध्य प्रदेश आणि मिझोराम या दोन्ही राज्यात २८ नोव्हेंबरला एकाच टप्प्यात, तर तेलंगला आणि राजस्थानमध्ये ७ डिसेंबरला एकाच टप्प्यात मतदान घेण्यात येणार आहे. या पाचही राज्यांचा निकाल ११ डिसेंबरला लागणार आहे.