मुंबई | भारतीय बँकांचे तब्बल ९००० कोटी रुपयांचे कर्ज थकवून परदेशात पसार झालेल्या मद्यसम्राट विजय माल्ल्याच्या प्रत्यार्पणासाठी मुंबईतील आर्थर रोड तुरुंगामध्ये मोठी तयारी सुरु आहे. आर्थर रोड कारागृहामधील बराक क्रमांक १२ चे रूप संपूर्णपणे पालटण्याचे काम सध्या सुरु आहे. बराकमधील रंगकाम, टाइल्स तसेच बाथरूमची दुरुस्ती आणि नूतनीकरणाला गेल्या महिन्याभरापासून सुरुवात झाली आहे.

माल्ल्याच्या प्रत्यार्पण प्रक्रियेत कोणत्याही प्रकारची अडचण येऊ नये म्हणून कारागृहाच्या २ कोठड्यांच्या दुरुस्तीचे आणि नूतनीकरणाचे काम करण्यात आल्याचे सांगण्यात येत आहे. प्रमेश कन्स्ट्रक्शन्स यांच्याकडे कारागृहाच्या दुरुस्तीचे कंत्राट देण्यात आले आहे. माल्ल्याच्या प्रत्यार्पणाची प्रकिया पूर्ण झाल्यानंतर त्यांना आर्थर रोड कारागृहातच ठेवण्यात येणार असल्याची माहिती मिळत आहे. तसेच याआधी कारागृहाच्या सुरक्षेसंदर्भातील अहवाल देखील इंग्लंडला पाठविण्यात आला आहे.

परंतु, कारागृहामध्ये डागडुजीची आवश्यकता असल्याने हे काम करण्यात येत आहे, असे स्पेशल आयजी दक्षिण मुंबई राज्यवर्धन सिन्हा यांचे म्हणणे आहे. तसेच कारागृहातील सर्वच कोठड्यांच्या दुरुस्तीचे आणि रंगकामाचे काम सुरु असल्याचेही त्यांनी सांगितले. आर्थर रोड जेलमध्ये नैसर्गिक प्रकाश येण्याची सोय नसल्याचे माल्ल्याने लंडन कोर्टात सांगितले होते. त्यानुसार सूर्यप्रकाशाच्या प्रतिबिंबासाठी कोठडीमध्ये एका भिंतीवर काळा रंग लावण्यात आला आहे.