आम्ही केवळ ४८ तास मागितले, त्यांनी ६ महिने दिले !

मुंबई | राज्यातील सत्तास्थापनेचा तिढा न सुटल्याने अखेर राज्यपालांकडून राज्यात राष्ट्रपती राजवट लागू करण्यात आली आहे. राज्यपालांनी दिलेल्या मुदतीत कोणताही पक्ष सरकार स्थापन करू न शकल्याने राज्याला या राष्ट्रपती राजवटीला सामोरे जावे लागले आहे. दरम्यान, याच पार्श्वभूमीवर एकीकडे राज्यात शिवसेना-काँग्रेस-राष्ट्रवादी एकत्र येऊन सरकार स्थापन करण्याच्या शक्यता आहेत. मात्र, राज्यपालांनी दिलेल्या मुदतीत या तिन्ही पक्षांचा निर्णय होऊ न शकल्याने हा तिढा कायम राहिला. दरम्यान, या पार्श्वभूमीवर थोड्याच वेळापूर्वी काँग्रेस-राष्ट्रवादीने संयुक्त पत्रकार परिषद घेऊन आपली भूमिका स्पष्ट केल्यानंतर आता शिवसेना पक्षप्रमुख उद्धव ठाकरे यांची देखील पत्रकार परिषद पार पडली आहे. यावेळी “पुढच्या काळात आम्ही काँग्रेस-राष्ट्रवादीसोबत एकत्र बसू आणि काय तो निर्णय घेऊ”, असे उद्धव ठाकरे यांनी स्पष्ट केले आहे.

उद्धव ठाकरेंच्या पत्रकार परिषदेतील महत्त्वाचे मुद्दे

• शिवसेनेने अधिकृतपणे ११ नोव्हेंबर रोजी काँग्रेस-राष्ट्रवादीशी संपर्क केला
• “आम्ही सरकार बनवू इच्छतो. पण, आम्हाला ४८ तासांची मुदत हवी”, अशी मागणी आम्ही राज्यपालांकडे केली.
• “पण राज्यपालांनी ४८ तासांऐवजी ६ महिन्यांचीच मुदत दिली”
• पुढच्या काळात आम्ही काँग्रेस-राष्ट्रवादीसोबत एकत्र बसू आणि काय तो निर्णय घेऊ
• आता आम्हाला खूप मुदत मिळाली आहे.
• आम्ही किमान सामान वाटप कार्यक्रमावर चर्चा करू, निर्णय घेऊ
• राष्ट्रपती राजवट लावण्यावर उद्धव ठाकरेंची टीका
• ‘त्या’ भिन्न विचारांच्या पक्षांच्या, अनैसर्गिक आघाड्यांचा अभ्यास करू. त्यानंतर निर्णय घेऊ, उद्धव ठाकरेंचा भाजपला टोला
• एवढी दयावान व्यक्ती राज्याला राज्यपाल म्हणून मिळाली नाही, उद्धव ठाकरेंचा राज्यपालांना उपरोधिक टोला
• हिंदुत्त्व आमची विचारधारा
• महाराष्ट्रात सरकार स्थापन करणे म्हणजे विरोध नव्हे
• आमचे मित्र चंद्रकांत पाटील यांनी आम्हाला सत्तास्थापनेसाठी शुभेच्छा दिल्या आहेत. आता आमच्या मित्राने शुभेच्छा दिल्या म्हणजे आम्हाला सत्तास्थापन केलीच पाहिजे.
• मंत्रिपदाचा राजीनामा दिल्याबद्दल अरविंद सावंत यांचे अभिनंदन.
• राजकारण आहे, एवढी घाई कशासाठी ?
• आमच्याकडे भाजपचा पर्याय होता, त्यांनीच तो संपवला.
• युती संपली असेल तर ती त्यांनी संपवली