मुंबई | कुर्ला पश्चिमेच्या हरियाणा वाला लेन परिसरातील प्रवेश द्वारासमोर असलेले पथदिवे तसेच वासनजीपाचू चाळीच्या समोरील पथदिवा गेल्या काही दिवसांपासून बंद असल्याने रात्रीच्या वेळी परिसरात काळोखाचे साम्राज्य पसरून स्थानिकांची मोठी गैरसोय होत आहे. संबंधीत प्रशासनाने सदरचे पथदिवे त्वरीत दुरुस्त करावेत.

या परिसरातील पथदिवे मागील अनेक दिवसांपासून बंद आहेत. बंद असलेल्या पथदिव्यांमुळे परिसरात अंधार पसरत असून, रात्रीच्या वेळी नागरिकांना अनेक अडचणींना तोंड द्यावे लागत आहे. त्यामुळे अपघात, चोऱ्या आदी प्रकार घडण्याची शक्यता आहे. तसेच महिलांना या वर्दळीच्या जागेतून ये-जा करताना भीती वाटत असल्याचे काही महिलांनी सांगितले. त्यामुळे लवकरात लवकर हे पथदिवे चालू करुन नागरिकांचे हाल थांबवावेत. अशी मागणी नागरिक करत आहेत.