मुंबई | बॉलिवूडचे डिस्को डान्सर आणि दिग्गज अभिनेते मिथुन चक्रवर्ती यांना अमेरिकेतील लॉस एंजलिस येथील एका रुग्णालयात दाखल करण्यात आले आहे. त्यांना पाठदुखीचा त्रास जाणवू लागल्याने उपचारासाठी अमेरिकेत गेले आहेत. मिथुन त्यांच्या सोबत त्यांच्या मुलगा महाअक्षय चक्रवर्ती आणि सून मदालासा शर्माही अमेरिकेत आहेत.

गेल्‍या वर्षभरापासून त्‍यांना पाठदुखीचा त्रास होत होता. त्‍यामुळे चित्रपटांच्‍या प्रोजेक्‍टवर त्‍यांना लक्ष देता येत नव्‍हते. यावर्षी मे महिन्‍यात त्‍यांना उपचारासाठी दिल्ली येथे आणण्‍यात आले होते. परंतु, आता मिथून चक्रवर्ती यांच्‍यावर लॉस एंजेलिसमध्‍ये उपचार सुरू असल्‍याचे वृत्त आहे. काही दिवसांपासून ते तेथील रुग्‍णालयात दाखल असल्‍याचे वृत्त आहे.

२००९ मध्ये लकी चित्रपटातील एक सीन करताना मिथुन चक्रवर्तींना दुखापत झाली. तेव्हापासून त्यांना पाठदुखीचा त्रास जडला आहे. २००९ मध्ये दुखापत झाल्यावर त्यांनी उपचार देखील घेतले होते. परंतु २०१६ मध्ये त्यांना पाठदुखीचा प्रचंड त्रास होऊ लागला. तेव्हा त्यांनी एक मोठा ब्रेक घेऊन या पाठदुखीवर उपचार केले. पाठदुखीचा त्रास त्यांना जास्त होऊ लागल्याने त्यांनी सध्या काम करणेही सोडले आहे.