मुंबई | “भाजपला मदत करणाऱ्या प्रकाश आंबेडकर यांनी धर्मनिरपेक्षतेचे धडे आम्हाला देऊ नयेत”, असे वक्तव्य राष्ट्रवादी काँग्रेसचे अध्यक्ष शरद पवार यांनी प्रकाश आंबेडकर यांना उद्देशून केले आहे. “शरद पवार हे धर्मनिरपेक्ष आहेत. परंतु, त्यांचा पक्ष धर्मनिरपेक्ष नाही. संभाजी भिडे यांची पिलावळ राष्ट्रवादी काँग्रेसमध्ये अधिक आहे, त्यामुळे राष्ट्रवादीसोबत आम्ही कधीही जाणार नाही” असे वक्तव्य भारिप बहुजन महासंघाचे नेते प्रकाश आंबेडकर केले होते.
प्रकाश आंबेडकरांवर टीका केल्यानंतर सरसंघचालक डॉ. मोहन भागवत यांच्यावरही शरद पवार यांनी टीका केली आहे. मुस्लिमांशिवाय हिंदुत्व अपूर्ण आहे, असे म्हणणाऱ्या भागवत यांच्यावर पवार यांनी निशाणा साधला आहे. मुस्लिम, ख्रिश्चन हे सर्व जण देशाचेच घटक असून आपल्याला असणारे सर्व अधिकार त्यांनाही आहेत. त्यामुळे ते आपल्या देशाचाच भाग आहेत हे कुणीही वेगळे सांगण्याची गरज नाही, अशा शब्दात पवार यांनी भागवत यांना टोला लगावला आहे.
प्रकाश आंबेडकर हे काल (गुरुवारी) मुंबईत घेतलेल्या पत्रकार परिषदेत बोलत होते. “आम्ही काँग्रेससोबत जाण्यास इच्छुक आहोत, परंतु राष्ट्रवादीसोबत कधीही जाणार नाही,” असे यावेळी आंबेडकर म्हणाले. यावर शरद पवार यांनी प्रकाश आंबेडकरांना प्रत्युत्तर दिले आहे. “राष्ट्रवादी काँग्रेस हा पक्ष धर्मनिरपेक्ष नसता तर अकोल्यातील दोन निवडणुकीत प्रकाश आंबेडकरांनी राष्ट्रवादीचा पाठिंबा घेतला नसता. प्रकाश आंबेडकर हे मला आधी धर्मनिरपेक्ष वाटायचे, पण आता वाटत नाहीत,” असे शरद पवार म्हणाले.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
