नवी दिल्ली | मध्य प्रदेशचे मुख्यमंत्री शिवराज सिंह चौहान यांचा मुलगा कार्तिकेय चौहान याचे नाव पनामा पेपर्समध्ये असल्याचा आरोप काँग्रेस अध्यक्ष राहुल गांधी यांनी केला होता. त्यामुळे शिवराज सिंह चौहान यांनी राहुल गांधी यांच्या विरोधात अब्रुनुकसानीचा दावा ठोकणार असल्याचे म्हटले होते. मात्र आता राहुल गांधी यांनी आपल्या विधानावर स्पष्टीकरण दिले होते. मध्य प्रदेशातील पत्रकारांशी बोलताना राहुल गांधी म्हणाले कि, “पनामा पेपर्समध्ये शिवराज सिंह यांच्या मुलाचे नाही तर छत्तीसगडचे मुख्यमंत्री रमण सिंह यांच्या मुलाचे नाव आहे. शिवराज सिंह यांचे नाव तर व्यापमं घोटाळ्यात होते.”

आपल्या विधानानंतर २४ तासांच्या आत राहुल गांधी यांनी हे स्पष्टीकरण दिले आहे. मध्य प्रदेश दौऱ्यात बोलताना राहुल गांधी यांनी शिवराज सिंह चौहान आणि त्यांच्या मुलावर आरोप केले होते. त्यानंतर मध्यरात्री ट्विट करून आपण राहुल गांधी यांच्याविरोधात आज (मंगळवारी) अब्रुनुकसानीचा खटला दाखल करणार असल्याचे चौहान यांनी म्हटले होते.

त्याचप्रमाणे कार्तिकेय सिंह यांनी देखील ट्विट करून राहुल गांधींचे विधान खोटे असल्याचे म्हटले होते.“पनामा पेपर्समध्ये माझे नाव आल्याचे राहुल गांधी यांचे विधान खोटे आहे. सार्वजनिक व्यासपीठावरुन माझी आणि माझ्या कुटुंबीयांची प्रतिमा मलिन करण्यात आली आहे. यामुळे मी दुःखी आहे. ४८ तासांच्या आत जर राहुल यांनी माफी मागितली नाही तर याविरोधात कठोर कायदेशीर कारवाई करेन,” असे कार्तिकेय यांनी म्हटले होते.

राहुल गांधींचे विधान

“पाकिस्तानचे माजी पंतप्रधान नवाज शरीफ यांचे नाव पनामा पेपर्समध्ये आल्यानंतर पाकिस्तानसारख्या देशानेही कारवाई करत त्यांना कारागृहात पाठवले. मात्र शिवराज सिंह चौहान यांच्या मुलाचे नाव पनामा पेपर्समध्ये येऊनही त्यांच्याविरोधात कोणती कारवाई केली गेली नाही,” अशी टीका राहुल गांधींनी केली होती.