उत्तम बाबळे

नांदेड :- हिमायतनगर तालुक्यातील एका मागासवर्गीय अल्पवयीन मुलीची विनयभंग केल्याप्रकरणी आरोपीला भोकर अति.जिल्हा व सत्र न्यायालयाचे न्यायाधिश एस.एम शेख यांनी २८ जुलै रोजी ३ वर्ष सक्त मजूरी व ११ हजार रुपये दंडाची शिक्षा सुनावली आहे. माै.एकंबा ता.हिमायतनगर येथील एका मागासवर्गीय १५ वर्षीय अल्पवयीन मुलीची देवराव उर्फ बाळू आनंदराव कल्याणकर (२५) रा.एकंबा याने दि.१९ फेब्रुवारी २०१६ रोजी तिच्या राहत्या घरी वाईट हेतूने छेड काढून जातीवाचक शिवीगाळ करुन विनयभंग केला.या प्रकरणी गुरन ३५/२०१६ कलम ३५४ (अ),४५१ व बाल लैगींक अत्त्याचार गुन्ह्यासह अनुसूचित जाती जमाती अत्त्याचार प्रतिबंधक कायद्यानुसार मुलीच्या मुलीच्या फिर्यादीवरुन हिमायतनगर पोलीसात गुन्हा दाखल करण्यात आला.सदरील गुन्ह्याच्या भोकर उपविभागीय पोलीस अधिकारी योगशकुमार शर्मा यांनी सखोल तपास करुन आरोपी विरुद्ध दोषारोपपत्र भोकर अति.जिल्हा व सत्र न्यालयात ४/२०१६ क्रमांकानुसार खटला दाखल केला होता.न्यायालयाने या गुन्ह्यात एकूण ६ साक्षीदार तपासले .पैकी पिडीत मुलगी,तिची आई व आजोबा यांची साक्ष सबळ ठरली.सरकारी वकील अॅड.एस.आर.कस्तूरे व आरोपीच्या बाजूने अॅड.बी.एम.कुंभेकर आणि अॅड.एस.बी.पवार यांनी युक्तीवाद केला.युक्तीवादाअंती ३ साक्षीदारांचे पुरावे आरोपी विरुद्ध गेले.या सबळ पुराव्यावरुन अति.जिल्हा व सत्र न्यायाधीश – १ एस.एम.शेख यांनी आरोपी देवराव कल्याणकर यास ३ वर्ष सक्त मजूरी व ११ हजार रुपये दंडाची शिक्षा सुनावली.तसेच पिडीत मुलीला १० हजार रुपये सानुग्रह निधी देण्यात यावा असे आदेश देण्यात आले.