कर्जबाजारी शेतकऱ्यांच्या जखमेवर मिठ चोळण्याचा सहकार विभाग व बँकांचा प्रकार

प्रतिनिधी। मुंबई

राज्यातील शेतकऱ्यांना कर्जमाफी मिळावी यासाठी विरोधीपक्ष जिवाचे रान करत असताना निर्ढावलेले राज्य सरकार काही केल्या त्यांना दाद देत नाही. अशातच शेतकऱ्यांच्या जखमेवर मिठ चोळण्याचा प्रकार सहकार विभागाने केला आहे. पीक विम्याची रक्कम ज्या शेतकऱ्यांच्या बँक खात्यात जमा झाली आहे, त्यातील पन्नास टक्के रक्कम थकीत कर्जाचा हप्ता म्हणून वसूल करण्याचा तुघलकी आदेश सहकार विभागाने काढला आहे. एवढ्यावरच हा प्रकार थांबलेला नसून रब्बी हंगामातील शेतमालाच्या विक्रीतून जमा केलेली रक्कम देखील थकीत कर्ज वसुलीसाठी गोठवण्यात आल्याचा धक्कादायक प्रकार उघडकीस आला आहे.

सलग तीन-चार वर्षे दुष्काळाचा सामना केल्यानंतर या वर्षी चांगला पाऊस झाल्यामुळे राज्यातील शेतकरी काहीसा सुखावला होता. तरीही अनेक शेतकऱ्यांनी पीक विमा काढून घेतला होता. पीक विम्याची रक्कम शेतकऱ्यांच्या खात्यावर जमा होत आहे. परंतु ही रक्कम शेतकऱ्यांना देण्याऐवजी बँकांनी ही रक्कम थकीत कर्ज म्हणून वळती करण्याचे लेखी पत्र सहकार व पणन विभागाने बँकांना दिले आहेत. या मुळे शेतकरी संतप्त झाला आहे. शासन शेतकऱ्यांना कर्जमाफी देण्यास तयार नाही. परंतु शेतकऱ्यांच्या हक्काचा पैसाही शासन शेतकऱ्यांच्या हाती देण्यास तयार नसल्याचे यावरून स्पष्ट झाले आहे. औरंगाबाद जिल्ह्यातील शेतकरी नेते जयाजीराव सूर्यवंशी यांनी हा प्रकार उजेडात आणला आहे. कन्नड तालुक्यातील शेतकऱ्यांनी कापूस विक्रीतून आलेली रक्कम बँक खात्यात जमा केली होती. ती रक्कम बँकांना गोठवून शेतकऱ्यांना जुन्या कर्जाची थकीत रक्कम भरण्याची मागणी केली आहे. कष्टाचा पैसा बँका आणि सहकार विभागामुळे शेतकऱ्यांना मिळत नाही. या प्रकाराबाबत बँका व सहकार विभाग मूग गिळून गप्प असून यावर प्रतिक्रीया देत नाही.