मोदी सरकारविरुध्द काँग्रेसचा अतिविराट मोर्चा

नांदेड | फ्रेंच कंपनीकडून राफेल नावाचे भारतीय सेना दलासाठी विकत घेण्यात येणार्‍या विमानाच्या खरेदीमध्ये मोदी सरकारने तब्बल 41 हजार कोटींचा भ्रष्टाचार केला असून या भ्रष्टाचाराविरुध्द काँग्रेसने देशभर आंदोलन सुरु केले आहे. त्याचाच भाग म्हणून नांदेडमध्ये पक्षाच्यावतीने काढण्यात आलेल्या अतिविराट मोर्चाला काँग्रेस कार्यकर्ते आणि नागरिकांनी उदंड प्रतिसाद दिला. आयटीआयपासून निघालेल्या या मोर्चात जिल्हाधिकार्‍या कार्यालयापर्यंत काँग्रेस कार्यकर्ते व नागरिकांच्या घोषणांनी परिसर दणाणून गेला.

राज्याचे माजी मुख्यमंत्री व महाराष्ट्र प्रदेश काँग्रेस कमिटीचे अध्यक्ष खा.अशोकराव चव्हाण यांच्या सूचनेवरुन जिल्हा व शहर काँग्रेस कमिटीच्यावतीने दि. २५ रोजी राफेल खरेदीच्या भ्रष्टाचार विरोधात मोर्चा काढण्यात आला. मोर्चाचे नेतृत्व अखिल भारतीय काँग्रेस कमिटीचे सचिव व महाराष्ट्राचे सह प्रभारी आ. संपतकुमार, आशिष दुआ,पीआरपीचे राष्ट्रीय अध्यक्ष आ.जोगेंद्र कवाडे, माजी पालकमंत्री आ. डी. पी. सावंत,काँग्रेसचे महानगराध्यक्ष आ.अमरनाथ राजूरकर,आ.वसंतराव चव्हाण यांनी केले.

सकाळी नांदेड शहर आणि परिसरात मोठ्या प्रमाणात पाऊस झाला. परंतु या पावसाचा परिणाम मोर्चावर मात्र कुठेच दिसून आला नाही. सकाळी 9 पासूनच काँग्रेस कार्यकर्त्यांचे जत्थे आयटीआय परिसराकडे येऊ लागले. 11 सुमारास महात्मा फुले पुतळा परिसरात 20 हजारांपेक्षा अधिक काँग्रेस कार्यकर्ते एकत्रित आले होते. या ठिकाणी पक्षाच्यावतीने जाहीर सभा घेण्यात आली. या सभेमध्ये नरेंद्र मोदी सरकारने राफेल खरेदीमध्ये केलेल्या भ्रष्टाचाराचा पर्दाफास करण्यात आला. यावेळी आ.संपतकुमार,आ.जोगेंद्र कवाडे, आ.डी.पी .सावंत, आ.अमरनाथ राजूरकर, आ.वसंतराव चव्हाण,लियाकत अली अन्सारी यांनी आपल्या भाषणातून मोदी सरकारवर चौफेर हल्ला केला. सूत्रसंचालन प्रवक्ते संतोष पांडागळे यांनी केले. यानंतर या मोर्चास आयटीआयपासून सुरुवात झाली. पहिले टोक आयटीआय येथे तर मोर्चाचे शेवटचे टोक शिवाजी महाराजांच्या पुतळ्याजवळ होते. यावरुन मोर्चाची भव्यता सहज लक्षात आली. जिल्हाधिकार्‍यांना निवेदन देवून मोर्चाची सांगता करण्यात आली.