मुंबई | डॉ. पायल तडवी आत्महत्या प्रकरणी शुक्रवारी (३१ मे) मुंबई सत्र न्यायालयात सुनावणी झाली. दरम्यान, यावेळी न्यायालयात क्राईम ब्रँचकडून या तिन्ही आरोपींच्या पोलीस कोठडीची मागणी केली होती. मात्र, मुंबई सत्र न्यायालयाकडून डॉ. पायल आत्महत्या प्रकरणातील डॉ. हेमा आहुजा, डॉ. भक्ती मेहेर, डॉ. अंकिता खंडेलवाल या तिन्ही महिला आरोपींना १० जूनपर्यंत न्यायालयीन कोठडी सुनावण्यात आली आहे. वैद्यकिय पदव्युत्तर शिक्षणाकरिता मुंबईच्या नायर हॉस्पिटलमध्ये शिक्षण घेत असलेल्या आदिवासी समाजातील डॉ. पायल तडवी यांनी आपल्या वरिष्ठांकडून होणाऱ्या रॅगिंगला कंटाळून बुधवारी (२२ मे) आत्महत्या केली. दरम्यान, या पार्श्वभूमीवर तीन आरोपींपैकी एक डॉ. भक्ती मेहेर यांनी या प्रकरणी आपली प्रतिक्रिया दिली आहे.

जात कोणाला माहित असते ? मुलांना एकमेकांची जात कुठे माहित असते ?

“आमच्या मुली या प्रकरणात दोषी नाहीतच. त्यांना दिवसभर कामच एवढे असते कि त्यांना हे सगळे प्रकार करायला वेळच मिळू शकत नाही. आमची मुलं पण याच परिस्थितीतून गेली. पण त्यांनी असं केलं का ? आमच्या मुलींवर जे आरोप लागले आहेत ते पूर्णपणे चुकीचे आहेत. जात कोणाला माहित असते ? मुलांना एकमेकांची जात कुठे माहित असते ? ज्या दिवशी आत्महत्या झाली त्या दिवशी सकाळी डॉ. पायल तडवी यांनी डॉ. भक्ती मेहेर यांना असिस्ट करत २ ऑपरेशन्स केली होती. जे निर्दोष आहेत त्यांना न्याय मिळालाच मिळालाच पाहिजे. तपास झालाच पाहिजे”, अशी प्रतिक्रिया या प्रकरणातील आरोपी डॉ. भक्ती मेहेर यांच्या आईने दिली आहे.

Mother of Bhakti Mehare (co-accused in Payal Tadvi suicide case): The allegations on them are false. They can't do anything like that…They are innocent, they will definitely get justice. Inquiry should be done so that the truth is revealed. pic.twitter.com/PgBf6C34TJ

— ANI (@ANI) May 31, 2019

माझी मुलगी पूर्णपणे निर्दोष, रॅगिंगचा विचारही करू शकत नाही !

“क्राईम ब्रॅंचपेक्षाही या प्रकरणाचा तपास अगदी सीबीआयकडे सोपविला तरी आमची काही हरकत नाही. आम्हाला चिंता नाही. परंतु, समाजासमोर सत्य आणा. माझी मुलगी ही यात पूर्णपणे निर्दोष आहे. ती कधीही कोणाला असं बोलू शकत नाही. रॅगिंगचा तर ती विचारही करू शकत नाही. तुम्ही आमची संपूर्ण कौटुंबिक पार्श्वभूमी तपासू शकता. मात्र, अशा पद्धतीच्या खोट्या बातम्या पसरवू नका. रॅगिंग होऊच शकत नाही. ते दररोज २००-२०० रुग्णांवर उपचार करतात. कामाचा ताण जास्त असतो. त्यात त्यांचे वरिष्ठ त्यांना ओरडतात. ते त्यांच्या कनिष्ठांना ओरडतात. हे शक्य आहे. मात्र, रॅगिंग होऊच शकत नाही. ज्या दिवशी आत्महत्या झाली त्या दिवशी सकाळी डॉ. पायल तडवी यांनी डॉ. भक्ती मेहेर यांना असिस्ट करत २ ऑपरेशन्स केली होती. क्राईम ब्रँच निश्चितच सत्य शोधून काढेल. या तिन्ही मुलींवर हा फार मोठा आघात आहे”, अशी प्रतिक्रिया या प्रकरणातील आरोपी डॉ. भक्ती मेहेर यांच्या वडिलांनी एच.डब्ल्यू.सोबत बोलताना दिली आहे.