अकोला | राज्यात वीज बिलवाढीसंदर्भात वातावरण तापलेलं असून मनसे प्रमुख राज ठाकरे यांनी शरद पवारांच्यावर आरोप केले होते. त्यावर राष्ट्रवादीचे प्रदेशाध्यक्ष जयंत पाटील यांनी राज ठाकरे यांच्यावर आता निशाणा साधला आहे. राज ठाकरे यांनी प्रसिद्धीची नितांत गरज आहे, अशी टीका जयंत पाटील यांनी केली. जयंत पाटील म्हणाले की, सध्या राज ठाकरे यांना प्रसिद्धीची गरज आहे, त्यामुळे ते अशाप्रकारचे निराधार आरोप करत आहेत. जलसंपदा मंत्री जयंत पाटील यांनी काल (७ फेब्रुवारी) अकोला जिल्हाधिकारी कार्यालयातील जलसंपदा विभागाला भेट दिली होती. त्यावेळी त्यांनी हे भाष्य केलं.
यावेळी त्यांनी जलसंपदा विभागाच्या विविध प्रकल्पांच्या कामाचा आढावा देखील घेतला आहे. त्यानंतर त्यांनी पत्रकारांशी बोलताना कोरोना काळात दिलेल्या आश्वासनापासून देखील घूमजाव केला आहे. याबाबत प्रश्न विचारला असता त्यांनी राज ठाकरे यांच्यावरच निशाणा साधला. राज ठाकरे यांना सध्या प्रसिद्धीची गरज असल्याने ते अशाप्रकारे निराधार वक्तव्य करीत असल्याचं त्यांनी यावेळी म्हटलं.
काय म्हणाले जयंत पाटील?
“वीज बिलवाढीसंदर्भात राज्य सरकार गंभीर आहे. यावर शरद पवारांच्या घरी अदानी आले आणि विजबिलाचा प्रश्न मागे पडला, असे विधान करणं म्हणजे हास्यास्पद आहे. सध्या राज ठाकरे यांनी प्रसिद्धीची नितांत गरज आहे. त्यामुळेच त्यांनी असे विधान केले आहे”, अशी टीका राज ठाकरेंवर केली. तर इंधन दरवाढीसंदर्भात बोलताना पाटील म्हणाले की, “केंद्राने इंधन दरवाढ कमी केल्यास दर नियंत्रणात येतील. केंद्र राज्याशी दुजाभाव करतं. त्यामुळे राज्यातील भाजप नेत्यांनी आम्हाला राज्याचे कर कमी करण्याचे शहाणपण शिकवू नये”, असा टोलादेखील जयंत पाटलांनी भाजप नेत्यांना लगावला.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
