मुंबई | अंधेरी पूर्व दुर्घटनेनंतर आता लोअर परळचा पूल धोकादायक असल्याचे जाहीर करण्यात आले आहे. त्यामुळे आजपासून हा पूल दुरुस्तीसाठी बंद करण्याचा निर्णय घेतला आहे. आज सकाळी सहा वाजल्यापासून दुरुस्तीपर्यंत हा पूल बंद राहणार असल्याचे रेल्वे प्रशासनाने म्हटले आहे.

पश्चिम रेल्वेचा हा पूल लोअर परळ स्थानकाजवळ असून ६४ डिग्रीतून तो रुळांना तिरका क्रॉस करून बांधला आहे. १७ जुलै रोजी या पुलाची आयआयटी मुंबई, महापालिका अधिकारी आणि रेल्वे प्रशासनाने प्राथमिक सुरक्षा तपासणी केल्यानंतर हा पूल तातडीने बंद करण्याची सूचना देण्यात आली होती. त्यामुळे पश्चिम रेल्वेने या पुलाच्या पुनर्बांधणीसाठी स्ट्रक्चरल इंजिनीअर्स आणि सल्लागाराच्या सुचनेनुसार आजपासून हा पूल बंद ठेवण्याचा निर्णय घेतला. या पुलाची लांबी ६२.७२ मीटर व रुंदी २३.२० मीटर इतकी आहे.

लोअर परळ स्थानकाबाहेर नागरिकांची गैरसोय

या पुलाच्या दुरुस्तीचं काम आजपासून सुरु झालं आहे. त्यामुळे दुरुस्तीचं काम पूर्ण होईपर्यंत पूल बंद राहणार असल्याचं रेल्वे प्रशासनाकडू सांगण्यात आलं आहे. पण, नागरिकांना याची पूर्वकल्पना नसल्याने या पुलाच्या खाली असलेल्या पर्यायी पुलावर नागरिकांची मोठ्या प्रमाणात गर्दी झाली आहे. गर्दीमुळे प्रवाशांचा आरडाओरडा सुरु आहे.

लोअर परेल स्थानकातून बाहेर पडण्यासाठी एक पूल उपलब्ध आहे, पण तो लहान आहे. पूल उतरल्यावर खाली चिंचोळी गल्ली आहे, त्यातच रस्त्यावर बाईक पार्क असतात. तिथून बाहेर पडायला प्रवाशांना 20 ते 25 मिनिट लागत आहेत. रेल्वे पूल करण्याआधी प्रशासनाने कोणतीही खबरदारी घेतली नसल्याचं तसंच पर्यायी रस्ता उपलब्ध करुन दिला नसल्याचं यावरुन दिसत आहे. महापालिका काय करत आहे, असा प्रश्न प्रवासी विचारत आहेत. तसेच प्रवाशांनी आणि नागरिकांनी सावधानता बाळगण्याचे आवाहन करण्यात आले आहे.