पत्नीच्या विरहाने पतीचेही निधन

वाडा (वार्ताहर) : विक्रमगड तालुक्यातील मौजे कुंर्झे येथील सुधाबाई रामचंद्र गायकवाड (७७)यांचे गेल्या शुक्रवारी अल्पशा आजाराने दु:खद निधन झाले.

या निधनानंतर अवघ्या सहाच दिवसांच्या अंतराने त्यांचे पती रामचंद्र गायकवाड (८२) यांचे हृदयविकाराच्या झटक्याने निधन झाले. पत्नीच्या निधनाचा धक्का सहन न झाल्यानेच रामचंद्र गायकवाड यांना हृदयविकाराचा तीव्र झटका आला असे त्यांच्या कुटूंबियांनी सांगितले. गायकवाड कुटुंबियांवर अचानक आलेल्या या दु:खामुळे संपूर्ण कुटुंबच हादरुन गेले आहे. आदिवासी विकासमंत्री तथा पालघरचे पालकमंत्री विष्णू सवरा, विक्रमगड पंचायत समितीचे सभापती मधुकर खुताडे, तालुकाध्यक्ष संदीप पावडे यांनी या गायकवाड कुटुंबियांच्या घरी जाऊन गायकवाड परिवाराचे सांत्वन केले.