नवी दिल्ली | “आमच्याकडे असे बरेच नेते आहेत ज्यांना माध्यमांशी बोलायला प्रचंड आवडते. त्यामुळे आम्हाला आता आमच्या या काही उत्साही नेत्यांना दुसरे काहीतरी काम देण्याची गरज आहे”, असे म्हणत केंद्रीय मंत्री नितीन गडकरी यांनी पुन्हा एकदा भाजप नेत्यांना घरचा आहेर दिला आहे. राफेल विमान खरेदी करार प्रकरणी संपूर्ण देशापुढे आपली बाजू मांडण्यासाठी भाजपकडून देशभरात तब्बल ७० पत्रकार परिषदा घेण्यात येणार आहेत. याबाबत नितीन गडकरी बोलत होते.

नितीन गडकरी यांनी यावेळी एका प्रसिद्ध हिंदी चित्रपटातील दृश्याचा दाखला देत आपले म्हणणे मांडले आहे. ‘बाँबे टू गोवा’ या हिंदी चित्रपटातील एका दृश्यात आपल्या मुलांना खाण्यापासून अडविण्यासाठी आई-वडील त्यांच्या तोंडात कापडाचा गोळा कोंबतात. आमच्या पक्षातील काही लोकांना देखील अशाच कापडाच्या गोळ्याची आवश्यकता असल्याचे नितीन गडकरी यांनी यावेळी म्हटले.

नितीन गडकरी यांनी अनेकदा आपल्या पक्षातील नेत्यांच्या तसेच कार्यकर्त्यांचा खटकणाऱ्या गोष्टींवर भाष्य केले आहे. काही महिन्यांपूर्वी नितीन गडकरींनी पक्षातील कार्यकर्त्यांच्या वर्तनावर नाराजी व्यक्त केली होती. “भाजप कार्यकर्त्यांचे वर्तन हे खरोखरीच अटलजींना अपेक्षित वर्तन आणि विचारांसारखे आहे का ?”, असा सवाल नितीन गडकरी यांनी केला होता. त्याचप्रमाणे, भाजपचे कार्यकर्ते, नेते हे ‘माझ्या गळ्यात लहान हार का घातला ह्यापासून मला फक्त चहाच का दिला, बिस्कीट का नाही ?’ अशा कोणत्याही क्षुल्लक कारणांवरून वाद घालत असतात असेही नितीन गडकरी यांनी म्हटले होते.