मुंबई | कुर्ला स्थानकात उतरणाऱ्या ज्येष्ठ महिलांना एका इमारतीत नेत लुटले जात असल्याच्या घटनेने खळबळ उडाली. ‘माझे लग्न झाले आहे. त्या आनंदात आई वृद्ध महिलांना साडी वाटतेय,’ असे सांगून कुर्ला स्थानकात उतरणाऱ्या ज्येष्ठ महिलांना एका इमारतीत नेत लुटले जात होते. अखेर कुर्ला पोलिसांनी प्रवासी बनून कुर्ला स्थानकात सुरू केलेली शोधमोहीम मुंब्य्रापर्यंत पोहोचली. आणि ज्येष्ठ महिलांना लुटणाऱ्या मोहम्मद अमीर इरफान (२०) ला अटक करण्यात आली.
मुंब्रा येथे राहत असलेला इरफान हा आठवी पास आहे. गुन्हे मालिका, चित्रपटांमध्ये लुटीच्या घटना बघून, त्यानेही तसेच पैसा मिळविण्याचे ठरविले. आणि पैश्याच्या शोधात त्याने कुर्ला स्थानक गाठले. स्थानकातून एकट्या बाहेर पडणाऱ्या महिलांचा तो पाठलाग करत असे. पुढे त्या महिला एखाद्या इमारतीजवळ पोहोचताच तो त्यांना थांबवायचा. लग्न, मुलगा झाल्याच्या आनंदात आई वृद्ध गरीब महिलांना साड्या वाटत असल्याचे सांगायचा. महिला जाळ्यात येताच, त्यांना समोरच्या इमारतीकडे जायचे असल्याचे सांगून सोबत घेऊन जायचे, इमारतीजवळ येताच गरीब वाटावे म्हणून दागिने पिशवीत काढून ठेवा, असा सल्ला तो महिलांना देत होता. त्याच्यावर विश्वास ठेवत, महिला अंगावरील दागिने काढून पर्समध्ये ठेवत. ती पिशवी इरफानकडे देऊन त्या इमारतीत जाताच इरफान दागिने घेऊन पसार व्हायचा.
गेल्या काही दिवसांत अशा स्वरूपाच्या घटनांनी डोके वर काढले. घटनेचे गांभीर्य लक्षात घेत, पीएसआय सत्यवान पवार यांनी अंमलदार पठाण, भाबड, जोशी, पाटील आणि काळे यांच्यासह आरोपीचा शोध सुरू केला. आणि अखेर त्याला बेड्या ठोकण्यात पोलिसांना यश आले.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
