मुंबई | ब्रिटिश काळापासून बॉम्बे म्हणून ओळख असलेल्या मुंबापुरीचे नाव बदलून १९९५ मध्ये मुंबई करण्यात आले. त्यानंतर ब्रिटिश काळात देण्यात आलेली सर्व नावे बदलण्याची मागणी होऊ लागली आहे. या नामकरणाची सुरुवात व्हिक्टोरिया टर्मिनसपासून झाली. पश्चिम उपनगरातील गोरेगाव आणि जोगेश्वरीमधील नवीन स्थानकाचे नाव राम मंदिर ठेवण्यात आले.

१९ जुलै २०१८ पासून एल्फिन्स्टन रोड स्थानक ‘प्रभादेवी’ असे ओळखले जाऊ लागले. तसेच १८३५ ते १८३९ या काळात त्या काळातील बॉम्बेचे राज्यपाल असलेले सर रॉबर्ट ग्रॅण्ट यांच्या नावाने असलेले ग्रॅण्ट रोड स्थानकाचे नाव बदलून ग्रामदेवी, करी रोड स्थानकाचे नाव लालबाग रेल्वे स्थानक, सँडहर्स्ट रोडचे नाव डोंगरी तर हार्बर मार्गावरील कॉटन ग्रीन स्थानकाचे नाव काळाचौकी, रे रोडचे नाव घोडपदेव करण्याची मागणी होत आहे.

देशभरात गुरुवार ६ डिसेंबर रोजी बाबासाहेबांना महापरीनिर्वाण दिनानिमित्त आदरांजली वाहण्यात आली. यावेळी देखील भीम आर्मी संघटनेकडून दादर रेल्वे स्थानकाचे नाव बदलून डॉ. बाबासाहेब आंबेडकर टर्मिनस असे करण्यात यावे अशी मागणी करण्यात आली आहे.