मुंबई | मराठी चित्रपटसृष्टीतील ज्येष्ठ अभिनेते विजय चव्हाण गेल्या अनेक दिवसांपासून आजारी आहेत. मधल्या काळात त्यांची प्रकृती सुधारली होती. परंतु आता पुन्हा एकदा प्रकृती बिघडल्याने त्यांना बुधवारी मुलुंडमधील फोर्टिस रुग्णालयात दाखल करण्यात आले आहे. गेली अनेक वर्षे विजय चव्हाण मराठी चित्रपटसृष्टी गाजवत आहे. रंगभूमीपासून सिनेमांपर्यंतच्या त्यांच्या सर्व भूमिका प्रेक्षकांच्या पसंतीस उतरल्या. मोरूची मावशी, श्रीमंत दामोदर पंत या नाटकातील त्यांनी रंगविलेल्या भूमिका अत्यंत लोकप्रिय ठरल्या. त्यांची प्रकृती स्थिर असल्याची माहिती मिळत आहे.

विजय चव्हाण यांचा अल्प परिचय

लालबागमधील एका मध्यमवर्गीय कुटुंबात विजय चव्हाण यांचा जन्म झाला. त्यांनी त्यांचे महाविद्यालयीन शिक्षण रुपारेल या कॉलेजमधून पूर्ण केले. कॉलेजमध्ये असताना ते अनेक एकांकिकांमध्ये भाग घेत असत. विजय चव्हाण यांना त्यांची पहिली एकांकिका विजय कदम यांच्यामुळे मिळाली. विजय चव्हाण यांच्या कारकिर्दीतील मोरूची मावशी हे सगळ्यात गाजलेले नाटक. ह्या नाटकासाठी पहिल्यांदा लक्ष्मीकांत बेर्डे यांना विचारण्यात आले होते. बेर्डे यांनी निर्मात्यांना विजय चव्हाण यांचेच नाव सुचविले. झपाटलेला, पछाडलेला अशा अनेक चित्रपटातील त्यांच्या भूमिका प्रचंड गाजल्या.