मुंबई | मुंबई हायकोर्टाने सीबीआय आणि एसआयटीला डॉ. नरेंद्र दाभोलकर आणि कॉम्रेड गोविंद पानसरे हत्या प्रकरणाच्या तपासात होत असलेला निष्काळजीपणावरून खडे बोल सुनावले आहे. शिवाय दाभोलकर-पानसरे हत्याकांडाबाबत तपासाचा प्रगती अहवाल स्वीकारण्यास हायकोर्टाने नकार दिला आहे. दाभोलकर-पानसरे ह्त्या प्रकरणात होत असलेल्या विलंबावरून मुंबई हायकोर्टाने ज्येष्ठ पत्रकार गौरी लंकेश हत्या प्रकरणाच्या तपासातून काही तरी शिका, असे म्हणाले.

तपास अहवालात वारंवार त्याच गोष्टी हायकोर्टापुढे मांडल्या जात आहेत. तपास आधिकारी बदलले जातात. या घटनांचा समाजावर होणारा परिणाम फार गंभीर स्वरुपाचा असतो. त्याची आम्हाला जास्त काळजी वाटत असल्याचे हायकोर्टाने म्हटले आहे.दाभोलकर-पानसरे हत्याकांडाच्या तपासाचा सीलबंद अहवाल सीबीआय आणि एसआयटीने मुंबई हायकोर्टात नेहण्यात आला होता. परंतु हायकोर्टाने या दोघांच्या हत्याकांडाच्या तपासाबाबत नाराजी व्यक्त करत हा सीलबंद अहवाल न वाचता परत केला. या हत्याकांडात सतत होत असलेली दिरंगाई आणि निष्काळजीपणा यामुळे हायकोर्टाने तपासावर नाराजी व्यक्त केली आहे.

हायकोर्टात दाभोलकर-पानसरे हत्याकांडाच्या सुनावणी दरम्यान सीबीआयचे सहसंचालक, गृहसचिव आणि एसआयटीचे प्रमुख यांनी देखील आज हजेरी लावली होती. यांच्यासमोर हायकोर्टाने तपासावर नाराजी व्यक्त केली. तपास यंत्रणा अजून दोन महिन्याचा अवधी मागत आहे. त्यानंतर सणासुदीचे दिवस असल्याने हा कालावधी हवा आहे का? सर्व यंत्रणा बंदोबस्तात व्यस्त असेल, अशा शब्दात हायकोर्टाने तपास यंत्रणेचे कान टोचले.