मुंबई- येथील ऐतिहासिक व सुप्रसिद्ध आर. के. स्टुडिओला शनिवारी दुपारच्या सुमारास भीषण आग लागली. आगीत स्टुडिओचे कोट्यवधी रुपयांचे नुकसान झाले. दोन ते तीन तास आग आटोक्यात आण्याचे प्रयत्न सुरू होते. आग विझवण्यासाठी अग्निशमन दलाच्या अनेक गाड्या तैनात होत्या. तरीही आग आटोक्यात येत नव्हती. आगीमुळे संपूर्ण परिसरात उंचच उंच धुराचे लोट दिसत होते. घटनास्थळी जाणाºया मार्गावरील वाहतूकही ठप्प झाली होती. अखेर उशिरा आगीवर नियंत्रण आणण्यात यश मिळाले. आगीचे कारण अद्याप झालेले नाही. परंतु स्टुडिओमध्ये बहुतांश वस्तू लाकडाच्या होत्या. त्यामुळे आगीने रौद्र रूप धारण केले. आगीत चित्रिकरणासाठी लागणारे साहित्य जळून खाक झाले आहे, त्याची किंमत कोट्यवधी रुपयांच्या घरात होती. या सर्व वस्तुंचा विमा काढलेला असणारच, त्यामुळे त्याची भरपाई मिळण्याची शक्यता आहे. दुसरे म्हणजे ही वास्तू अनेक कारणांसाठी ऐतिहासिक असली तरी सध्याच्या वातावरणात ती कालबाह्य वाटत होती. आगीत ही वास्तू उध्वस्त झालेलीच आहे, त्यामुळे या ठिकाणी पुन्हा स्टुडिओ उभारणीसाठी मोठा कालावधी लागण्याची शक्यता आहे, त्या ऐवजी या जागेचा उंच इमारत उभारण्यासाठी भविष्यात वापर होण्याची शक्यता वर्तवली जात आहे.