नवी दिल्ली: भारताचे १४ वे राष्ट्रपती म्हणून गुरुवारी रामनाथ कोविंद यांची निवड झाली. १७ जुलै रोजी झालेल्या निवडणुकीचा निकाल आज जाहीर झाला. यामध्ये राष्ट्रीय लोकशाही आघाडीचे (रालोआ) उमेदवार कोविंद विजयी ठरले. संसद भवनात आज सकाळपासून ही मतमोजणी सुरू होती. यामध्ये कोविंद यांना ६५.३५ टक्के मते मिळाली तर त्यांच्या प्रतिस्पर्धी आणि संयुक्त पुरोगामी आघाडीच्या (यूपीए) उमेदवार मीरा कुमार यांना एकूण ३४.३५ टक्के मते मिळाली आहेत. या निवडणुकीसाठी विविध राज्यांतील ४१२० आमदार आणि ७७६ खासदारांना मतदान करण्याचा अधिकार होता. त्यापैकी ९९ टक्के आमदार-खासदारांनी १७ जुलै रोजी मतदानाचा हक्क बजावला होता. रामनाथ कोविंद यांची राष्ट्रपतीपदी निवड झाल्यानंतर एनडीएच्या गोटात आनंदाला उधाण आले आहे. दिल्लीत भाजपच्या कार्यकर्त्यांकडून फटाके फोडून रामनाथ कोविंद यांच्या विजयाचा आनंद साजरा केला जात आहे. या पार्श्वभूमीवर पंतप्रधान नरेंद्र मोदी आणि भाजप अध्यक्ष अमित शहा कोविंद यांना भेटण्यासाठी १० अकबर रोड येथील त्यांच्या तात्पुरत्या निवासस्थानाच्या दिशेने रवाना झाले आहेत.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
