मुंबई | पु. ल. देशपांडे लेखक, गीतकार, संगीतकार, गायक, दिग्दर्शक, अभिनेते असे अष्टपैलू व्यक्तिमत्व लाभलेले पु. ल. देशपांडे खरेच ‘महाराष्ट्र भूषण’ होते. महाराष्ट्राचे लाडके ‘भाई’ अर्थात पुलंच्या साहित्यकृतींवर आजवर बरीच नाटके आणि चित्रपट झाले आहेत. पण आता पुलंचीच जीवनगाथा मोठ्या पडद्यावर येणार आहे. निर्माते- दिग्दर्शक महेश मांजरेकर हा चित्रपट प्रेक्षकांच्या भेटीला आणणार आहेत.

‘फाळकेज् फॅक्टरी’ या नावाने चित्रपट निर्मितीची नवी कंपनी महेश मांजरेकर यांनी सुरू केली आहे. या बॅनरअंतर्गत हा पहिला चित्रपट प्रदर्शित होणार आहे. ‘भाई.. व्यक्ती की वल्ली’ या चित्रपटाच्या माध्यमातून ते पुलंचा जीवनपट उलगडून दाखवणार आहेत. चित्रपटात भाई अर्थात पु. ल. देशपांडे यांची भूमिका सागर देशमुख तर सुनीताबाईंची भूमिका इरावती हर्षे साकारत आहेत. या चित्रपटाची पटकथा गणेश मतकरी यांची असून ज्येष्ठ साहित्यिक रत्नाकर मतकरी यांनी या चित्रपटाचे संवाद लिहिले आहेत. रंगभूषेतील कौशल्यासाठी जगभरात प्रसिद्ध असलेले विक्रम गायकवाड रंगभूषेतून अनेक प्रसिद्ध व्यक्तिमत्त्वांना चेहरा देणार आहेत. यावर्षी पुलंच्या जयंतीदिनी म्हणजेच ८ नोव्हेंबर रोजी हा चित्रपट प्रदर्शित होणार आहे. त्यानिमित्ताने याच काळात म्हणजेच ४ जानेवारी २०१९ रोजी हा चित्रपट प्रदर्शित होणार अशी घोषणा ११ जून रोजी वरळी येथे करण्यात आली.

‘पुलंवर मराठी माणसाचे किती प्रेम आहे, हे वेगळे सांगण्याची गरज नाही. त्यांचा अभिनय, त्यांचे साहित्य, त्यांचे वक्तृत्व, त्यांचा संगीताचा अभ्यास, त्यांचा दानशूरपणा, त्यांनी जपलेले सामाजिक भान हे सगळे आपण पाहिले आणि ऐकले आहे. त्याबद्दल अनेकदा वाचलेही आहे. पण असा हा अष्टपैलू अवलिया, माणूस म्हणून नेमका कसा होता? या लाडक्या व्यक्तिमत्वाचे व्यक्तिगत आयुष्य नेमके कसे होते, याबाबत फारसे कधी लोकांसमोर आलेच नाही. म्हणूनच ‘भाई: व्यक्ती की वल्ली’मधून पु. ल. देशपांडे यांच्या आयुष्याचे अप्रकाशित पैलू प्रेक्षकांपुढे मांडण्याचा मी प्रयत्न करणार आहे.” महेश मांजरेकर यांनी चित्रपट निर्मिती मागील भूमिका स्पष्ट केली.