मुंबई: देशात लोकशाही अस्तित्वात आहे की नाही, असा प्रश्न पडावा, असे काहीसे उदाहरण घडले आहे. पंतप्रधान नरेंद्र मोदी यांच्याविरोधात सोशल मीडियावर लिखाण केले म्हणून एका पोलीसाला निलंबित करण्यात आले आहे. रमेश शिंदे असे या पोलिसाचे नाव असून अहमदनगर जिल्ह्यातील संगमनेर येथील आहे. या कारवाईचा सर्व स्तरातून निषेध होत आहे. व्यक्ती स्वातंत्र्याचा गळा दाबवण्याचा प्रयत्न या सरकारकडून सुरू असल्याचे हे आणखी एक उदाहरण म्हणावे लागले.

काँग्रेसचे ज्येष्ठ नेते आणि माजी मंत्री बाळासाहेब थोरात यांचे अंगरक्षक शिंदे यांनी पंतप्रधान नरेंद्र मोदी यांच्याविरोधात सोशल मीडियावर लिखाण केल्याच्या कारणावरून जिल्हा पोलीस अधीक्षक रंजनकुमार शर्मा यांनी शनिवारी निलंबनाची कारवाई केली. शिंदे हे अनेक वर्षांपासून माजी मंत्री थोरात यांचे अंगरक्षक म्हणून काम करत आहेत. शिंदे यांनी व्हॉट्सअ‍ॅपवरुन मोदींविरोधातील लिखाणाचा मजकूर अनेक ग्रूपवर पाठवल्याच्या तक्रारीनंतर सायबर विभागाने याप्रकरणाची चौकशी केली. मोदीविरोधातील मेसेज शिंदे यांच्या मोबाईलवरुन व्हायरल झाल्याचं आढळल्यानंतर ही कारवाई करण्यात आली.