लखनौ | उत्तर प्रदेशचे मुख्यमंत्री योगी आदित्यनाथ यांची रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांनी शनिवारी त्यांच्या मंत्रालयातील दालनात लखनौ येथे भेट घेतली. या भेटीत उभय नेत्यांमध्ये उत्तर प्रदेशातील लोकसभा निकडणुकीबाबत सुमारे अर्धा तास चर्चा झाली. आगामी लोकसभा निवडणुकीत रिपब्लिकन पक्ष भाजप सोबत युती निश्चित करणार असून युतीसाठी लोकसभा निवडणुकीत रिपब्लिकन पक्षाला भाजप ने चार जागा सोडाव्यात असा प्रस्ताव यावेळी रामदास आठवले यांनी मुख्यमंत्री योगी आदित्यनाथ यांना दिला. उत्तर प्रदेशात मागील निवडणुकीत भाजपला रिपब्लिकन पक्षाची मोठी मदत झाली असून आगामी निवडणुकांत रिपाइंची साथ भाजपसाठी महत्वपूर्ण असल्याचे सांगत लोकसभेच्या चार जागा रिपाइं ला सोडण्याच्या प्रस्तावावर भाजपचे राष्ट्रीय अध्यक्ष अमित शहा यांच्याशी बोलून निर्णय घेणार असल्याचे आश्वासन योगी आदित्यनाथ यांनी रामदास आठवलेंना यावेळी दिले.
रिपब्लिकन पक्षाचे राष्ट्रीय अध्यक्ष केंद्रिय राज्यमंत्री रामदास आठवले हे दोन दिवस उत्तर प्रदेशच्या दौऱ्यावर असून या दौऱ्यात लखनौ आणि बस्ती या जिल्ह्यांचा दौरा केला . रिपाइं च्या विविध सभांना संबोधित केले. तसेच उत्तर प्रदेश चे मुख्यमंत्री योगी आदित्यनाथ आणि राज्यपाल महामहिम राम नाईक यांची भेट घेतली. राज्यपाल राम नाईक यांच्याशी उत्तर प्रदेशातील मागसावसर्गीयांच्या प्रश्नांवर चर्चा झाली.
आगामी लोकसभा निवडणुकांच्या पार्श्वभूमीवर बहुजन समाज पक्ष आणि समाजवादी पार्टी यांची झालेली युती म्हणजे विळ्या भोपळ्याची युती आहे. बसपा आणि सपा च्या कार्यकर्त्यांना ही युती मान्य नसल्याने जागावाटपाच्या वादातून ऐन लोकसभा निवडणुकित सपा बसपा ची युती तुटेल त्याचा फायदा भाजप रिपाइं युती निश्चित होईल असे सांगत आगामी लोकसभा निवडणुकीत भाजपला किमान 60 जागांवर विजय प्राप्त होईल असा विश्वास रामदास आठवले यांनी प्रसिद्धीमाध्यमांशी बोलताना व्यक्त केला.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
