मुंबई | मराठा क्रांती मोर्चा प्रमुख वीस मागण्या घेऊन सोमवारी (२६ नोव्हेंबर) विधानभवनावर पुन्हा एकदा धडकणार आहे. या निर्णायक आंदोलनासाठी मराठा समाज आपल्या वाहनांसह मुंबईत दाखल होत असल्याने राजधानीत मोठी वाहतूक कोंडी होण्याची शक्यता आहे. त्यामुळे पोलिस यंत्रणा सतर्क झाली असून, पोलिस बंदोबस्तात वाढ करण्यात आली आहे.
मराठा आरक्षणाबाबत राज्य मागासवर्ग आयोगाचा अहवाल सादर झाल्यानंतर मराठा समाजाला किती टक्के व कोणत्या प्रवर्गातून कायद्याच्या कसोटीवर टिकणारे आरक्षण सरकार देणार, याबाबत मराठा समाजाचे लक्ष लागले आहे. त्यासाठी आरक्षणासह प्रमुख वीस मागण्यांसाठी पुन्हा एकदा ‘चलो मुंबई’ची हाक देण्यात आली आहे.
सोमवारी होणार्‍या आंदोलनासाठी १६ नोव्हेंबरपासून गावोगावी मराठा संवाद यात्रा काढून जनजागृती करण्यात आली असून, या यात्रेला मिळालेला प्रतिसाद पाहता लाखो मराठा बांधव सोमवारी मुंबईत धडकतील. तसेच हजारो वाहने मुंबईत दाखल होणार असल्याचा समन्वयकांचा दावा आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
