पुणे | भीमा-कोरेगाव विजय दिवशी एसआरपीएफच्या १२ तुकड्या, १२०० होमगार्ड व २००० समता सैनिक दलाचे स्वयंसेवकांसह कडेकोट बंदोबस्त तैनात करण्यात येणार असल्याची माहिती विशेष पोलीस महानिरीक्षक विश्वास नांगरे पाटील यांनी दिली आहे. ते पत्रकार परिषदेत बोलत होते. यंदा प्रशासनाकडून १ जानेवारी २०१७ रोजी भीमा-कोरेगाव विजय दिवसाच्या निमित्ताने चोख व्यवस्था ठेवण्यात येणार आहे. गेल्या वर्षी भीमा-कोरेगाव येथे उसळलेल्या हिंसाचाराच्या पार्श्वभूमीवर या वर्षी कोणताही अनुचित प्रकार घडू नये यासाठी प्रशासनाकडून मोठी खबरदारी घेतली जात असल्याचे दिसत आहे.
“भीमा-कोरेगाव विजय दिवसासाठी प्रशासन सज्ज असून यावेळी घातपात विरोधी पथक देखील तैनात करण्यात आले आहे. यावेळी जे लोक जातीय मुद्दे उकरून काढून असंतोष निर्माण करण्याच्या प्रयत्न करतील त्यांच्यावर लोकांवर प्रतिबंधात्मक कारवाई केली जाईल. त्याचप्रमाणे सोशल मीडियावर अफवा पसरवणाऱ्यांवर देखील कारवाई करण्यात येईल”, असे विश्वास नांगरे पाटील यांनी स्पष्ट केले आहे.
भीमा-कोरेगाव १ जानेवारी २०१७ रोजी झालेल्या दंगलीत मोठा हिंसाचार उसळलेला होता. या दंगलीचा तीव्र परिणाम संपूर्ण राज्यात पाहायला मिळाला होता. दरम्यान, काहीच दिवसांपूर्वी भीमा-कोरेगाव येथील विजय स्तंभाच्या जागेचा ताबा राज्य सरकारकडे देण्याचे आदेश मुंबई उच्च न्यायालयाने दिले आहेत. १२ जानेवारीपर्यंत हा ताबा राज्य सरकारकडेच असणार आहे. विजय स्तंभाच्या जागी ३० डिसेंबर ते २ जानेवारीपर्यंत सामाजिक कार्यक्रम आयोजित करण्यासाठी पुणे जिल्हाधिकाऱ्यांनी उच्च न्यायालयात अर्ज दाखल केला होता.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
