मुंबई | पंतप्रधान मोदी यांची आज (२६ एप्रिल) मुंबईत एमएमआरडीए मैदानात सभा होणार आहे. संध्याकाळी ७ च्या सुमारास पंतप्रधान मोदींची ही सभा पार पडेल. तर राष्ट्रवादी काँग्रेसचे अध्यक्ष शरद पवार यांची देखील आज डोंबिवली आणि ठाण्यात प्रचार सभा होणार आहे. देशात एकूण ७ टप्प्यांमध्ये लोकसभा निवडणूक पार पडणार आहे. त्यांपैकी पहिल्या ४ टप्प्यात महाराष्ट्रासाठी मतदान प्रक्रिया पार पडत आहे. त्यापैकी ३ टप्प्यांसाठीची मतदान प्रक्रिया पूर्ण झाली असून आता केवळ १ टप्पाच शिल्लक राहिला आहे. महाराष्ट्रातील हा चौथा, शेवटचा आणि अत्यंत महत्त्वाचा टप्पा सोमवारी (२९ एप्रिल) पार पडणार आहे. शनिवारी (२७ एप्रिल) या टप्प्यासाठीच्या प्रचाराच्या तोफा थंडावतील. त्यामुळे बहुतेक राजकीय पक्ष हे आजच मुंबईसह ठाण्यात प्रचारसभा घेणार आहेत.
पंतप्रधान मोदींच्या या मुंबईतील सभेला मुख्यमंत्री देवेंद्र फडणवीस, शिवसेना पक्षप्रमुख उद्धव ठाकरे यांच्यासह भाजप-शिवसेनेचे अन्य दिग्गज नेते देखील उपस्थित राहतील. उद्धव ठाकरे हे गुरुवारी (२५ एप्रिल) मध्यरात्रीच पंतप्रधान मोदींचा उमेदवारी अर्ज भरण्यासाठी वाराणसीत दाखल झाले आहेत. पंतप्रधान मोदी सकाळी ११.३० च्या सुमारास आपला उमेदवारी अर्ज दाखल करतील त्यावेळी उद्धव ठाकरे उपस्थित असतील. त्यानंतर ते दुपारी १ वाजता मुंबईसाठी रवाना होतील. संध्याकाळी मुंबईत पार पडणाऱ्या पंतप्रधान मोदींच्या सभेत देखील ते उपस्थित असतील. पंतप्रधान मोदी, शरद पवार यांच्यासह भिवंडी आणि मुंबईत वंचित बहुजन आघाडीच्या देखील सभा होणार आहेत.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
