ठाकरे सरकारने माफी मागून दंडाचे पैसे लोकांना परत करावेत !

मुंबई । “राज्यातील ठाकरे सरकारने २ किलोमीटरचा नियम सांगून मुंबई पोलीसांनी ४० हजारांहून अधिक गाड्या जप्त करून मोठा दंड आकारला. लोकांच्या खिशात आधीच पैसे नसताना महाविकासआघाडी सरकारची ही कोणती दादागिरी?”, असा सवाल आता भाजप आमदार राम कदम यांनी उपस्थित केला आहे. मात्र, मुंबई पोलिसांच्या या ‘२किमीच्या’ निर्णयाबाबत राष्ट्रवादीचे अध्यक्ष शरद पवारांनी मुख्यमंत्र्यांकडे तीव्र नाराजी व्यक्त केल्याने आता हे निर्णयच रद्द करण्यात आला आहे. फक्त नागरिकांनी आपल्या नजीकच्या परिसरात वस्तूंची खरेदी करावी, अशा सूचना आता मुंबई पोलिसांकडून देण्यात आल्या आहेत. यावरून देखील भाजपने टीका केली आहे.

1/1 महाराष्ट्र सरकारने दोन किलोमीटरचा नियम सांगून 40 हजार पेक्षा अधिक गाड्या @CPMumbaiPolice जप्त करून त्याला मोठा दंड आकारला आधीच खिशात पैसे नाहीत त्यातून #MVA सरकारची अशी दादागिरी ? @CMOMaharashtra @OfficeofUT @AnilDeshmukhNCP

— Ram Kadam (@ramkadam) July 4, 2020

“२ किलोमीटर असा शब्द काढून नवीन नेबरहूड हा शब्द आला परंतु मुंबईकरांना झालेल्या त्रासाचे त्यांच्या दंडासाठी भरलेल्या पैशांचे का ? महाविकासआघाडी सरकारच्या लहरी स्वभावामुळे सर्वसामान्यांना प्रचंड त्रास झाला आहे”, अशी टीका राम कदम यांनी सरकारवर केली आहे. त्याचप्रमाणे, “सरकारने जनतेची माफी मागत वसूल केलेल्या दंडाचे पैसे परत करावेत”, अशी मागणी देखील यावेळी राम कदम यांनी आपल्या ट्विटमध्ये केली आहे. दरम्यान, ‘अनलॉक २’करिता मुंबई पोलिसांकडून घेण्यात आलेल्या ‘२ किमीच्या’ निर्णयावर लोकांकडूनही मोठी नाराजी व्यक्त केली गेली. शरद पवार, राज्याचे गृहमंत्री अनिल देशमुख यांनी देखील यावर आक्षेप घेतला. त्यामुळे हा निर्णय अखेर रद्द करण्यात आला.

1/2आता कळतंय कि दोन किलोमीटर शब्द काढला नवीन नेबरहूड हा शब्द आला परंतु मुंबईकरांना झालेला त्रासाचं त्यांच्या दंडा साठी भरलेल्या पैशाचं काय ?#MVA सरकारच्या लहरी स्वभावामुळे सर्वसामान्यांना प्रचंड त्रास झालाय सरकारने जनतेची माफी मागत दंड वसूल केला त्यांचे पैसे परत करावेत

— Ram Kadam (@ramkadam) July 4, 2020