मुंबई | सध्या मुंबईत २०१९ च्या सार्वत्रिक निवडणुकांच्या पूर्वतयारीसाठी राष्ट्रवादी काँग्रेसची महत्त्वपूर्ण बैठक सुरू आहे. राष्ट्रवादी काँग्रेसचे अध्यक्ष शरद पवार यांच्या लोकसभा निवडणूक लढवण्याबाबत गेल्या काही दिवसांपासून मोठी चर्चा रंगली होती. मात्र शरद पवार यांनी “मी लोकसभा निवडणूक लढविणार नसल्याचे याआधीच जाहीर केले आहे. त्यामुळे पुण्यातून निवडणूक लढविण्याचा काहीच प्रश्नच नाही, या शब्दात लोकसभा निवडणूक लढविण्याचा चर्चेला पूर्णविराम दिला आहे.

आज मुंबईत राष्ट्रवादी भवन येथे लोकसभा मतदारसंघनिहाय बैठका राष्ट्रीय अध्यक्ष खा. @PawarSpeaks यांच्या प्रमुख उपस्थितीत घेण्यात येत आहेत. #औरंगाबाद, #रायगड, #मावळ व #पुणे शहर, #शिरूर व #जळगाव च्या बैठका पार पडल्या आहेत. इतर जिल्ह्यांच्या या मॅरेथॉन बैठका दिवसभर चालणार आहेत. pic.twitter.com/sJYxp194tN

— NCP (@NCPspeaks) October 6, 2018

आगामी लोकसभा निवडणुकीच्या तयारीसाठी शरद पवार यांनी पुणे लोकसभा मतदार संघाची आढावा बैठक मुंबईत घेतली होती. राष्ट्रवादी काँग्रेसच्या या बैठकीत प्रदेशाध्यक्ष जयंत पाटील यांच्यासह माजी उपमुख्यमंत्री अजित पवार, धनंजय मुंडे, माजी मंत्री छगन भुजबळ हे सर्व उपस्थित होते.

राष्ट्रवादी काँग्रेसच्या नेत्यांकडून ‘पुणे लोकसभा मतदार संघातून शरद पवार यांनी निवडणूक लढवावी’ असा आग्रह केला जात आहे, अशी माहिती राष्ट्रवादीचे प्रवक्ते अंकुश काकडे यांनी दिली होती. येत्या लोकसभा निवडणुकीसाठी काँग्रेस आणि राष्ट्रवादी काँग्रेसच्या महाआघाडीत राष्ट्रवादीने पुणे, औरंगाबाद आणि हतकणंगले या मतदार संघांसह राज्यातील २५ जागांवर दावा केला असल्याची माहिती मिळत आहे.