नवी दिल्ली | “सचिन पायलट यांनी राजस्थान विधानसभा निवडणुकांसाठी प्रचंड कष्ट केले आहेत. त्यामुळे जर सचिन पायलट यांना राजस्थानचे मुख्यमंत्री केले नाही तर आपण काँग्रेस पक्षातून बाहेर पडणार”, असा इशारा राजस्थानातील आमदार पी. आर. राणा यांनी दिला आहे. त्याचसोबत, “आत्तापर्यंत गेहलोत यांनी काय केले ?”, असा सवालही राणा यांनी केला आहे. मध्य प्रदेश, राजस्थान आणि छत्तीसगड या तीन मोठ्या राज्यांमध्ये काँग्रेसने दणदणीत विजय मिळवला. परंतु, आता राजस्थानच्या मुख्यमंत्री पदासाठी नाव निश्चित करताना मोठा पेच निर्माण झाला आहे.

Congress leader Sachin Pilot leaves from his residence in Delhi pic.twitter.com/DdahZSttxG

— ANI (@ANI) December 13, 2018

अशोक गेहलोत आणि सचिन पायलट या दोन नेत्यांची नावे राजस्थानच्या मुख्यमंत्रीपदासाठी सुचविली जात असून या दोन्ही नेत्यांचे समर्थक आता आक्रमक झाले आहेत. “राजस्थान विधानसभा निवडणुकीसाठी सचिन पायलट यांनी केलेल्या कष्टाचे फळ त्यांना मिळालेच पाहिजे. राजस्थानात निम्म्याहूनही अधिक आमदारांचे सचिन पायलट यांना समर्थन आहे. त्यामुळे तेच राजस्थानचे मुख्यमंत्री झाले पाहिजेत”, असे पी.आर.राणा यांनी म्हटले आहे. सचिन पायलट आणि अशोक गेहलोत या दोन्ही नेत्यांना काँग्रेसच्या ज्येष्ठ नेत्यांनी दिल्लीला बोलावून घेतले असून राजस्थानचा मुख्यमंत्री कोण याबाबतच निकाल आज संध्याकाळपर्यंत जाहीर होण्याची, शक्यता आहे. राजस्थानचा मुख्यमंत्री कोण होणार याकडे संपूर्ण राजकीय वर्तुळाचे लक्ष आहे.