मुंबई | मुंबईतील महत्त्वाच्या लालबहादूर शास्त्री मार्ग येथील या शीव ते मुलुंड मार्गाच्या रुंदीकरणात तब्बल १७०० दुकानदार रस्त्यावर आले आहेत. या प्रकरणी पालिका स्थायी समितीत चांगलेच पडसाद उमटले सर्वपक्षीय सदस्यांनी पालिकेला धारेवर धरले गाळेधारकांकडे पालिका प्रशासन १९६२ चे पुरावे का मागता असा सवाल करत गाळेधारकांचा व्यवसाय बुडणार असल्याने त्यांचे पुनर्वसन व्यावसायिक संकुल बांधून करा अशी मागणी सर्वपक्षीय सदस्यांनी केली आहे.
मुंबईतील एलबीएस मार्गाच्या रुंदीकरणाचे काम सध्या सुरू आहेत. या पार्श्वभूमीवर पालिकेच्या माध्यमातून होणाऱ्या कामादरम्यान येणारी बांधकामे तोडण्यास सुरुवात करण्यात आली आहे. यामध्ये मागील ४० वर्षापूर्वीपासून व्यवसाय करणाऱ्या दुकानदारकांचे गाळे तोडण्यात येत असल्याने पालिका विरोधी पक्षनेते रवी राजा यांनी स्थायी समितीत हरकतीचा मुद्दा उपस्थित केला. या मार्गावरील एकूण दोन हजार बांधकामांपैकी तब्बल ८० टक्के बांधकामे व्यावसायिकांची असल्याचे त्यांनी सांगितले. यातील तोडलेल्या गाळेधारकांना पर्यायी जागा उपलब्ध करून दिली जात नसल्यामुळे गाळेधारक आता नगरसेवकांकडे धाव घेत असल्याचेही ते म्हणाले आहेत.
या गाळेधारकांना मुंबईबाहेर हाकलण्याचा पालिका प्रशासनाला डाव असल्याचा आरोपही त्यांनी केला. यावेळी शिवसेनेचे रमेश कोरगावकर, राजूल पटेल, सदानंद परब, राष्ट्रवादी काँग्रेसच्या गटनेत्या राखी जाधव यांनीही पालिका प्रशासनाचा गाळेधारकांना हद्दपार करण्याचा डाव असल्याचा आरोप त्यांनी केला. तर रस्ता रुंदीकरणात गाळेधारकांचा व्यवसाय बुडणार असल्याने त्यांचे पुनर्वसन व्यावसायिक संकुल बांधून करा अशी मागणी नगरसेवक रमेश कोरगावकर यांनी केली. या प्रकरणी गंभीर दखल घेत स्थायी समिती अध्यक्ष यशवंत जाधव यांनी संबंधित गाळेधारकांच्या पुनर्वसनासाठी खास धोरण तयार करा. असे निर्देश पालिका प्रशासनाला दिले आहेत. झोपड्यांच्या पुनर्वसनासाठी २००० सालापर्यंतचा नियम लावता मग वर्षानुवर्षे व्यवसाय करणाऱ्या गाळेधारकांकडे १९६२ चे पुरावे कसे मागता असा सवालही त्यांनी केला आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
