नवी दिल्ली | भीम आर्मीचे प्रमुख चंद्रशेखर आझाद उर्फ रावण हे महाराष्ट्र दौऱ्यावर येणार आहेत. यावेळी चंद्रशेखर आझाद हे मुंबईसह संपूर्ण महाराष्ट्रात एकूण चार जाहीर सभा घेणार आहेत. भीमा-कोरेगाव येथे ३० डिसेंबरला आझाद यांची जाहीर सभा होणार असून या सभेत आझाद नेमके काय बोलणार याकडे सर्वांचे लक्ष लागून राहिले आहे. गेल्या वर्षी झालेल्या भीमा-कोरेगाव हिंसाचाराच्या पार्श्वभूमीवर यावेळी पुन्हा तशा प्रकारची स्थिती निर्माण होऊ नये, असे मत व्यक्त केले जात आहे.
भीमा-कोरेगाव हे आमचे तीर्थस्थळ असून सभेसाठी जे स्थळ निश्चित करण्यात आले आहे तेथेच जाहीर सभा होणार असल्याचे आझाद यांनी स्पष्ट केले आहे. त्याचप्रमाणे या परिसरातील वातावरण खराब होऊ नये ही जबाबदारी सरकारची आहे, असे चंद्रशेखर आझाद यांनी एका मराठी वृत्तवाहिनीला दिलेल्या मुलाखतीत म्हटले आहे.
दरम्यान, काहीच दिवसांपूर्वी कायदा सुव्यवस्थेच्या कारणास्तव मुंबई पोलिसांनी ‘भीम आर्मी’च्या सभेला परवानगी नाकारली होती. भीम आर्मीचे प्रमुख चंद्रशेखर आझाद उर्फ रावण यांच्या सभेसाठी भीम आर्मीने वरळीतील जांबोरी मैदानात त्याचप्रमाणे दादरच्या चैत्यभूमी परिसरात सभेच्या आयोजनाची परवानगी मागितली होती. परंतु, मुंबई पोलिसांनी या कार्यक्रमासाठीची परवानगी नाकारली आहे.
“भीम आर्मीने शिवप्रतिष्ठानच्या संभाजी भिडेंच्या मुंबईतील कार्यक्रमाला विरोध केल्याने जाणूनबुजून पोलीस आमच्या कार्यक्रमाला परवानगी नाकारली”, असे भीम आर्मीने म्हटले होते.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
