मॉस्को | भारताची अंतराळ संशोधन इस्रोचा एक अंतराळवीर आता थेट पृथ्वीच्या कक्षेत असलेल्या आंतरराष्ट्रीय अंतराळ स्थानकावर जाऊ शकणार असल्याची माहिती मिळत आहे. “२०२२ पर्यंत भारतीय अंतराळवीर पृथ्वीच्या कक्षेत असलेल्या या आंतरराष्ट्रीय अंतराळ स्थानकावर जाणार आहे. तसेच प्रशिक्षणानंतर सोयूझ या रशियाच्या यानातून २०२२ साली भारतीय अंतराळवीर स्थानकावर रवाना होणार आहे”, असे रशियन अंतराळ संशोधन संस्थेने म्हटले आहे. आता पर्यंत पृथ्वीच्या कक्षेत असलेल्या आंतरराष्ट्रीय अंतराळ स्थानकावर अमेरिका, रशिया, जपान यांसारख्या देशांचे अंतराळवीर जाऊन आलेले आहेत.
भारताची अंतराळ संशोधन संस्था ‘इस्रो’ २०२२ साली आपला भारतीय अंतराळवीर अंतराळात पाठवणार आहे. या मोहिमेच्या आधी किंवा नंतर एखाद्या भारतीय अंतराळवीराला अंतराळ स्थानकावर पाठवण्यात येईल, अशी माहिती मिळत आहे. आंतरराष्ट्रीय अंतराळ स्थानक हे पृथ्वीच्या नजीकच्या कक्षेतील राहण्यास योग्य असे कृत्रिम उपग्रह आहे. ‘२०२२ सालापर्यंत इस्रो आपले अंतराळवीर अवकाशात पाठवण्यासाठी पूर्णपणे सक्षम आहे’, असे इस्त्रोचे अध्यक्ष के.शिवन यांनी सांगितले होते.
देशाच्या ७२व्या स्वातंत्र्यदिनी “२०२२ साली अंतराळात भारताचा तिरंगा फडकेल” असा विश्वास पंतप्रधान नरेंद्र मोदी यांनी व्यक्त करत ‘मिशन गगनयान’ या मोहिमेची घोषणा केली होती. ‘भारतीय अंतराळवीराला स्वबळावर अंतराळात घेऊन जाणे हे इस्रोचे लक्ष्य आहे. पण त्याचबरोबर या मोहिमेद्वारे देशभरात १५ हजार नोकऱ्यांची निर्मिती होणार आहे’, अशी माहितीदेखील इस्रोचे अध्यक्ष के. शिवन म्हणाले होते.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
