लखनऊ | गेल्या काही दिवसांपासून भगवान हनुमान हे नेमक्या कोणत्या जातीचे आहे. यावरून उत्तर प्रदेशात चांगलेच राजकारण पेटले आहे. या वादात आता उत्तर प्रदेशमधील मंत्री लक्ष्मी नारायण चौधरी यांनी म्हटले की, ”जाट हे भगवान हनुमानाचे वंशज आहेत”, असे वादग्रस्त विधान केले आहे. याआधी उत्तर प्रदेशमधील विधान परिषदेचे भाजपचे आमदार बुक्कल नवाब यांनी हनुमान हे मुस्लीम होते, असे वादग्रस्त विधान केले आहे.तर आता आणखी एका मंत्र्यांने हनुमान हे जाट समाजातील होते, असा दावा केला आहे.

याआधी उत्तर प्रेदशचे मुख्यमंत्री योगी आदित्यनाथ यांनी भगवान हनुमान हे दलित असल्याचे वक्तव्य केले होते. जैन धर्मगुरू आचार्य निर्भय सागर महाराज यांनी, हनुमान हे जैन होते, असा दावा केला होता. हनुमान यांच्या जातीवरून वेगवेगळे दावे केले जात असल्याने आता नव्यावादाची ठिणगी पडली आहे. या वादात हनुमान यांचे नाव रोज एका जातीशी जोडले जात आहे.

नारायण चौधरी नेमके काय बोलेले

”जाट हे भगवान हनुमानाचे वंशज आहेत”, असे वादग्रस्त विधान उत्तर प्रदेशमधील धार्मिक व्यवहार मंत्री लक्ष्मी नारायण चौधरी यांनी केले आहे. ‘भगवान श्रीराम यांची पत्नी देवी सीता यांचे रावणाने अपहरण केले. त्यानंतर हनुमान यांनी लंकेचे दहन केले. ज्यावेळी कोणावर अन्याय होतो तेव्हा तिथे जाट हस्तक्षेप करतात. हा जाट समाजाचा नैसर्गिक गूण आहे. हनुमान देखील देवी सीतेच्या रक्षणासाठी धावून गेले. यामुळे हनुमान हे जाट असल्याचे सिद्ध होते, असे चौधरी यांनी म्हटले आहे.